S’8 de santandria oto fèminas sardas sunt istadas premiadas in sa manifestatzione “Fèminas 2022”. Las at premiadas in su Ros’e Mari Farm & Greenhouse de Donigala Fenughedu Coldiretti Donne Impresa Sardegna, chi pro su de ses annos at ideadu e promòvidu su prèmiu de sas fèminas sardas pro sas fèminas sardas. Unu riconnoschimentu destinadu a chie si distinghet in su campu suo, de traballu o àteru, cun istòrias importantes chi a bortas sa gente non connoschet ma chi faghent meda pro sa sotziedade.
Sas oto Fèminas de ocannu sunt in antis de totu fèminas cun istòrias importantes, fatas de sacrifìtzios, chi podent èssere esempru pro àteras fèminas, màssimu pro sas giòvanas.
Ocannu in sa categoria Cultura at retzidu su prèmiu Caterina Murino, modella e atora de ratza casteddaja, istimada meda dae sa gente.
In sa categoria Agricoltura su prèmiu l’at retzidu Cesarina Marcello de su Movimentu Pensionados de Coldiretti: 86 annos, est istada sìndiga in Tiana e sa prima agri-panificadora de su territòriu suo.
Sa premiada prus giòvana est Eleonora Meloni, in sa categoria Isport: 20 annos, campionessa europea 2021 pro sa categoria “arco nudo juniores”, est in sa natzionale italiana dae tantos annos.
Su prèmiu pro sa categoria Ispetàculu l’at retzidu Maria Luisa Còngiu de Ulìana, emblema de sa mùsica sarda: nàschida e vìvida in Roma finas a sos 18 annos, s’est incantada de sa Sardigna e la contat in sas cantzones suas.
In sa categoria Informatzione su prèmiu est pro Mariangela Pira de Durgali: giornalista bagamundu, at traballadu cun giornales importantes (Ansa, Mediaset, La7 e Sky) e est una de sas giornalistas de economia prus apretziadas.
Pro sa categoria Istitutziones at retzidu su prèmiu Paola Dessì, prefeta de Tàtari, prima prefeta fèmina de Sardigna.
Saturnina Tanda at retzidu su prèmiu pro sa categoria de sas Sièntzias: in su 1976 aiat abertu una potecaria in Tàtari in su bighinadu Santa Maria di Pisa chi a pustis de pagu tempus fiat devènnidu su Bronx de cussa tzitade. In sa potecaria sua paris cun sas meighinas si dat agiudu a sas famìllias e si lis dat ascurtu e cunfortu.
Pro sa categoria sotziale at retzidu su prèmiu suor Maria Mastinu, de Milis, chi dae 18 annos est in Palestina agiuende a sos pitzinnos chi bivent situatziones de dificultade manna. In antis, suor Maria est istada pro trinta annos infermiera in Congo.
“Fèminas prèmiat s’universu femminile in totu sas isfumaduras suas – ispiegat Elisabetta Secci, responsàbile de Coldiretti Donne Impresa Sardegna, presente a sa premiatzione paris cun totu sas responsàbiles provintziales de su “Movimento Donne” de sa Coldiretti -. Onni annu bogat a campu istòrias interessantes e prenas de significadu, esempros pagu connotos de fèminas de valore umanu mannu, ànimas gentiles e prenas de coràgiu chi aberint ventanas importantes in sa sotziedade nostra”.
(GF.P.)
