Cun ocannu sunt 70 annos dae s’incoronatzione de sa màgine de Nostra Signora de su Remèdiu. Su comitadu, capitanadu dae su retore de sa Sea mussegnore Gianfranco Murru cun sa supervisione de s’archipìscamu mussegnore Roberto Carboni, at cuncordadu unu programma ispetziale pro pònnere in evidèntzia s’importàntzia pastorale e sos elementos ispirituales de s’eventu.
“A festare a Nostra Signora de su Remèdiu – si leget in una nota ispaniada dae su comitadu – dat s’oportunidade de onorare a su Fìgiu: Maria est sa bena de sa vida cristiana nostra, chi oferit su remèdiu a dolos e peleas siat a sa Crèsia siat a onni òmine chi sufrit in sa carena e in s’ispìritu. In sos ùrtimos meses sa comunidade arborense s’est preparende a s’eventu cun pellegrinàgios vicariales e cunferèntzias marianas. Nos at allegradu meda chi paba Frantziscu apat mandadu comente imbiadu ispetziale suo su vicàriu generale pro sa Tzitade de Vaticanu e archipreìderu de sa Basìlica de Santu Pedru in Vaticanu, cardinale Màuro Gambetti. Custu cardinale, chi tenet 56 annos ebbia (unu de sos prus giòvanos de su Sacru Collègiu) est connotu dae s’archipìscamu nostru, sunt ambos duos padres minores cunventuales”.
Setanta annos a como su paba Pio XII aiat imbiadu a cardinale Federico Tedeschini, archipreìderu de sa Sea Vaticana, camerlengo e pìscamu de Velletri. Imbàtidu a Aristanis benende dae Roma, in s’istatzione aiat agatadu a lu retzire s’archipìscamu Fraghì, sas autoridades tziviles e militares e unu mare de gente chi l’aiat acumpangiadu finas a pratza de sa Sea. Sunt istadas dies de festa, finas a imbàtere a su ritu solenne de s’incoronatzione de sa màgine de Nostra Signora: su cardinale at postu sa corona de oro bene traballada in conca a sa Vìrgine, dende s’incàrrigu a canònigu Mastino de pònnere sa corona a su Pitzinnu. Sas crònacas e sas fotografias de custu eventu los ant publicados (a pustis de una chirca istòrica curada dae su comitadu) in unu libru chi s’at a presentare su 27 de austu in su salone de Santu Domìnigu in Aristanis.
Sa festa de su Remèdiu est comintzada su 28 de austu cun sa prutissione de sa màgine dae sa Sea a sa basìlica de su Remèdiu. In cussa data sunt comintzadas sas novenas: sa traditzionale a sas 5 de sero (h 17) e cussa pro sas famìllias a sas 9 de sero (h 21).
Su 7 de cabudanni at a imbàtere a Aristanis s’imbiadu apostòlicu cardinale Gambetti. A lu retzire b’at a èssere s’archipìscamu Carboni, sos pìscamos sardos, sas autoridades e sa gente.
S’8 de cabudanni est sa festa de su Remèdiu. Sa prima missa at a èssere a sas 5 e a pustis si nd’at a fàghere una onni ora finas a sa cuntzelebratzione de sas 6 de sero (h 18) presèdida dae s’archipìscamu Roberto Carboni.
Su 9 de cabudanni, in prus de sas funtziones traditzionales, s’at a fàghere sa missa cun malàidos e voluntàrios, presèdida dae su delegadu de sa diòtzesi pro sa Pastorale de sa Suferèntzia. Pro coronare sa festa b’at a àere unu cuntzertu sinfònicu.
Programma
SÀBADU 27 DE AUSTU 2022
H 20,00 Auditorium San Domenico (carrera Lamarmora): Presentatzione de su libru “Nostra Signora del Rimedio di Oristano. Storia, fede e devozione” (Camelia Edizioni).
DOMÌNIGA 28 DE AUSTU 2022
h 21,00 - Prutissione solenne a cara a sa Basìlica (si movet dae sa Sea e si passat peri su tzentru istòricu, pratza Roma, carrera Tirsu, carrera Casteddu, Ponti Mannu finas a sa Basìlica de su Remèdiu)
Novenas in Basìlica
(dae su 29 de austu a su 6 de cabudanni)
h 17 – Rosàriu totu paris e Novena de sa traditzione
h 18 – Missa cun prèiga
h 20,30 – Rosàriu totu paris
h 21 – Segunda novena
MÈRCURIS 7 DE CABUDANNI
Solennidade de Nostra Signora de su Remèdiu, patrona de s’archidiòtzesi Arborense
70° anniversàriu de s’Incoronatzione
Missas: h 5, 6, 7, 8, 9, 10, 11, 12
h 16,30 – Segundos vespros capitulares
h 18,00, Pratza de sa Basìlica – Cuntzelebratzione eucarìstica solenne presèdida dae su cardinale Màuro Gambetti (vicàriu generale de su paba e archi-preìderu de sa Basìlica de Santu Pedru, imbiadu dae su paba). Paris cun issu tzèlebrant sos archipìscamos e sos pìscamos de Sardigna e sos preìderos arborenses e alerenses.
GIÒBIA 8 DE CABUDANNI 2022
Natividade de Maria, festa populare de su Remèdiu
Missas: h 5, 6, 7, 8, 9, 10, 11, 12, 17
h 18, pratza de sa Basìlica – Cuntzelebratzione eucarìstica solenne presèdida dae s’archipìscamu mussegnore Roberto Carboni
h 21 – Missa de concruos presèdida dae su retore mussegnore Gianfranco Murru
CHENÀBURA 9 DE CABUDANNI 2022
Festa de Maria Salus Infirmorum
Missas: h 6, 7, 8, 9, 10, 11, 12
h 17 in Basìlica – Cuntzelebratzione eucarìstica pro sos malàidos presèdida dae su delegadu diotzesanu pro sa Pastorale Sanitària padre Gianluca Longobardi, OFM caputzinos
h 20 – Missa de concruos presèdida dae su retore mussegnore Gianfranco Murru
h 21 – Cuntzertu sinfònicu.
(GF.P.)
