Aristanis est una de sas tzitades sardas chi partètzipant a su Fèstival natzionale pro s’Isvilupu sustenìbile chi s’at a fàghere su 20 de santugaine.
Giòbia 13 de santugaine dae sas 3 a sas 7 de sero (h 15-19), s’Assessoradu a s’Ambiente de su Comune de Aristanis e su CEAS Aristanis ant aparitzadu su “Giardinu de sa bio-diversidade”, cun atividades de cura de sas prantas e esempros de comente si faghet a las prantare e a las pudare.
“Custu est unu de sos eventos de su Fèstival pro s’Isvilupu sustenìbile Sardigna 2030 promòvidu dae s’Assessoradu regionale a s’Ambiente in su cuntestu de su Fèstival de s’Isvilupu sustenìbile 2022 promòvidu dae ASVIS – narat s’assessore a s’Ambiente de su Comune de Aristanis Maria Bonaria Zedda -. Sa punna de CEAS est a responsabilizare sa gente pro cantu atenet a s’isvilupu sustenìbile e a sos obietivos de s’-agenda 2030 promòvidos dae sa Regione Sardigna: economia de recùperu, cultura de inclusione, seguresa informàtica, calidade de sa partetzipatzione pùblica, chirca e innovatzione, forestatzione urbana. Una de sas prioridades de su mundu de oe est de passare a una manera de bìvere prus ecològica. A fàghere partetzipare sa gente, sas impresas e sos entes locales est una punna de importu mannu”.
“Cherimus pònnere in parte sa comunidade in s’amparu de su birde pùblicu, pro crèschere su sensu de apartenèntzia a sos logos de sa tzitade, contivigende.los” ponet in evidèntzia su coordinadore de su CEAS Antonio Ricciu.
(GF.P.)
