Finas su litzeu clàssicu “De Castro” de Aristanis at a dare su contributu suo in sa realizatzione de FestivalScienza Oristano, chi ocannu est imbàtidu a sa de sete editziones.
Sa manifestatzione organizada paris cun su Cunsòrtziu UNO est programmada dae su 16 a su 18 de santandria e previdet de abèrrere a sas iscolas mèdias de sa tzitade e de sa provìntzia. De sas atividades si nd’ant a ocupare sos professores Giuseppe Tumbarinu, Annalisa Chessa e Maria Rita Quartu.
S’at a comintzare a sas 10,30 de mèrcuris 16, die chi Nadia Lambiase (fundadora e presidente de “Mercato Circolare”) at a presentare su libru suo “Blue revolution”, intervistada dae sa professoressa Sabrina Sanna. A pustis sa classe 2B de su litzeu clàssicu at a guidare sos istudiantes de s’iscola mèdia in unu laboratòriu ispiradu a sos personàgios de su Printzipeddu de Antoine de Saint-Exupéry, cun atividades de grupu intituladas “Educhiamoci alla sostenibilità” e chi tenent comente argumentu sos temas ambientales.
Giòbia 17 e chenàbura 18, semper a sas 10,30, sa 2E de s’indiritzu giurìdicu at a lèghere branos leados dae su libru de Nadia Lambiase, chi tenent comente argumentu su tema de non tènnere prus tempus. S’at a partire dae su cuntzetu de tzircularidade de sa vida de sos grecos antigos, faghende una riflessione in contu de sa sotziedade moderna chi “impreat e fùlliat”. A pustis sa 2B at a torrare a fàghere su laboratòriu “Educhiamoci alla sostenibilità”.
A sas 10, in cussas matessi dies, cun sa guida de professor Tumbarinu sos istudiantes de su litzeu clàssicu ant a fàghere sos laboratòrios de chìmica in contu de sas trasformatziones de sa matèria. Cun issos, sos pitzocos de sas mèdias ant a faeddare de monòmeros e polìmeros e ant a imparare comente fàghere a iscumpònnere sas sustàntzias.
Est possìbile a si prenotare mandende una mail a s’indiritzu dorapinna@gmail.com, ponende su nùmene, sambenadu, iscola de provenièntzia e die seberada.
“A sos istudiantes chi ant a bènnere a su litzeu de inditu issoro lis amus a dare una giustificatzione de presentare a s’iscola de provenièntzia – ispiegat su dirigente de s’Istitutu -. In cussas matessi dies s’at a pòdere visitare s’iscola e otènnere informatziones in contu de su cursu de istùdios de su litzeu clàssicu”.
(GF.P.)
