Su progetu de Fondazione Oristano pro s’organizatzione de sa Sartìglia est resurtadu su primu in sa graduatòria de su Ministeru de sa Cultura, Economia e Finàntzias pro finantziare sos carrasegares istòricos. Unu resurtadu bonu meda, mancari su cuntributu nche siat caladu dae 95mìgia a 24mìgia èuros ca b’at istadu domandas meda.
Sa Fondazione Oristano, chi at tentu 94 puntos, at fatu mègius de sa Fondazione Carnevale di Viareggio, de su Comune de Fano e de sa Fondazione Carnevale di Putignano (2°, 3° e 4°). Venezia est a pustis ancora.
“Su primu postu assignadu dae sos Ministèrios de Cultura, Economia e Finàntzia mustrat chi Fondazione Oristano est faghende unu bonu traballu” cummentat su presidente de Fondazione Oristano Andrea Lutzu, ex sìndigu de Aristanis. “Dispraghet chi, pro neghe de sos tropu partetzipantes, su cuntributu est caladu dae 95mìgia a 24mìgia èuros”.
Finas su sìndigu nou de Aristanis est cuntentu meda: “Sa Fondazione Sartiglia in antis, e sa Fondazione Oristano a pustis sunt nàschidas pro gosare de sas oportunidades chi dant sas istitutziones” at sutaliniadu Sanna. “In sas chidas chi benint su Cussìgiu comunale at a discùtere s’istatutu nou de sa Fondazione sighende sos inditos de s’Anac, pro chi si megioret sa sistematzione sotzietària e organizativa tales chi s’atzione chi agiuat sas polìticas comunales in contu de cultura e de turismu siat semper prus profetosa”.
Cun su decretu ant retzidu contributu finas àteros carrasegares sardos: Tèmpiu (in su de 12 postos, cun 20.486 èuros de contributu), Santu Lussurzu (su de 34, cun 18.181 èuros) e Bosa (su de 40, cun 17.669 èuros).
Sos carrasegares istòricos finantziados cun su Fundu ùnicu pro s’ispetàculu sunt 53, pro unu totale de 911.000 èuros.
(GF.P.)
