Eris 21 de santandria sos carabineris de su Cumandu provintziale de Aristanis ant ammentadu sa festa de Nostra Signora Virgo Fidelis patrona de s’Arma e sa Die de s’Òrfanu.
Sa funtzione dedicada a sa Virgo Fidelis, Nostra Signora de s’Isperàntzia, presèdida dae s’archipìscamu Roberto Carboni, fiat in sa Sea in presèntzia de sas autoridades polìticas e militares e de sos rapresentantes e familiares de s’Assòtziu Natzionale Carabineris.
Su cumandante provintziale, colonnellu Erasmo Fontana, at lèghidu s’argumentu de sa die chi ammentat sa decoratzione cun medàllia de oro pro valore militare a sa bandera de s’Arma in sa batalla de Culqualber, in ue su 1° Batallione Carabineris e Zaptiè at gherradu contra a sas fortzas britànnicas in Àfrica orientale, dae su 6 de austu a su 21 de santandria de su 1941.
Fontana at ammentadu chi sa die dedicada a sa Virgo Fidelis l’at proclamada paba Pio XII s’11 de santandria de su 1949: “Su paba matessi – at naradu su cumandante provintziale – nd’at fissadu sa data a su 21 de santandria de onni annu, sa matessi die de su sacrifìtziu de sos carabineris de Culqualber”.
In su 1949 s’ordinàriu militare archipìscamu Carlo Alberto Ferrero de Cavallerleone at iscritu cussa “Preghiera del carabiniere alla Virgo Fidelis” chi si leghet finida sa funtzione religiosa.
(GF.P.)
