Cun un’ordinàntzia de su 14 de abrile 2022, su sìndigu de Aristanis Andrea Lutzu at istabilidu de nche bogare sos camper chi non sunt autorizados dae sos parchègios de carrera Emilio Lussu, carrera Ibba, sa pratza manna in dae in antis de sa Cuestura e dae totu su territòriu comunale.
B’at deghe dies de tempus pro lu fàghere e a pustis sa Politzia at a fàghere sa rimotzione fortzada.
Sos parchègios de carrera Lussu sunt ocupados dae paritzos meses in manera abusiva dae 8 caravan. S’àrea no est atretzada pro chi sa gente si bi firmet pro tempus meda (non b’at abba e non faghet a eliminare s’arga), duncas sa sosta sighida de sos camper ponet in perìgulu s’igiene e sa salude pùblica.
In custos meses sos residentes e àteros tzitadinos ant sinnaladu bortas meda custa situatzione dìliga, e sa Politzia (locale e de Istadu) at fatu paritzos interventos e verbales ma cun pagu resurtadu. Duncas pro evitare chi sa situatzione peoret, su sìndigu at fatu s’ordinàntzia in rispetu de su Còdighe de s’Istrada.
(GF.P.)
