Sa Fondazione Oristano e su dipartimentu de Sièntzias econòmicas e aziendales de s’Universidade de Casteddu ant comintzadu a collaborare pro crèschere su valore turìsticu de su territòriu de Aristanis.
Sa cunventzione, sutascrita dae su diretore de su Dipartimentu SEA Rinaldo Brau e dae su presidente de sa Fondazione Oristano Francesco Deriu, règulat sas atividades didàticas e de chirca chi s’ant a fàghere totu paris comente seminàrios, cunvegnos, partetzipatzione a progetos de chirca, cumpartzidura de resurtados de chirca in eventos de comunicatzione.
In sas dies coladas sas atividade las ant presentadas in su Monastèriu betzu de su Càrmene, sede de su Cunsòrtziu UNO, in un’eventu chi b’ant leadu parte su presidente de sa Fondazione Oristano Francesco Deriu, su coordinadore de su cursu de làurea in Economia e Gestione aziendale Patrizio Monfardini, su dotzente de Percursos culturales e turìsticos de su cursu de làurea in Economia e Gestione aziendale Mattia Sanna Montanelli, sa dotzente de Istatìstica pro sas aplicatziones aziendales e presidente de su Comitadu Turismu de sa Fondazione Oristano Giulia Contu, su diretore de su Consorzio UNO Francesco Asquer e s’assessore a sa Cultura de su Comune de Aristanis Luca Faedda.
Sos istudiantes Martina Veronica Leoni, Luisa Liliana Loi, Luca Contu, Lara Vigo e Laura Gungui, chi benint dae logos diversos de Sardigna e sunt iscritos a su cursu universitàriu de Aristanis, ant faeddadu de su progetu “L’oristanese: tra acqua e cultura” chi punnat a valorizare su tema de s’abba, resursa de importu mannu pro su territòriu de Aristanis dae sos tempos prus antigos. Ant postu in evidèntzia, paris cun s’abba, àteros setores de importu: s’archeologia, sa gastronomia, sa sacralidade e su bene-istare. Su percursu, chi sighit su tema de s’abba, movet dae Aristanis e previdet de fàghere un’itineràriu in 5 firmadas, dae su Sinis a su Barigadu: s’istagnu de Santa Giusta, s’istagnu de Crabas, su putzu de Santa Cristina, sas termas de Fordongianus e sa diga de Santa Chiara in su lagu Omodeo.
“S’itineràriu – ant ispiegadu in sa presentatzione – cheret dare valore a s’abba in sas tantas manifestatzione suas chi, in sa provìntzia de Aristanis, ant permìtidu s’insediamentu de s’òmine in dae sos tempos prus antigos. S’abba est s’elementu chi prus de totus at distintu sos territòrios, sa cultura e s’istòria de custos logos”.
In onni firmada de s’itineràriu b’at a àere QR Code geolocalizados chi ant a ispiegare su paesàgiu e sas caraterìsticas de su situ.
Fondazione Oristano at a publicare s’itineràriu in su situ de promotzione turìstica www.oristano.info.it.
(GF.P.)
