Su 2022 est finidu cun unu frocu asulu e su 2023 est comintzadu in sa matessi manera, in s’ispidale Santu Martinu de Aristanis. L’at comunicadu sa Asl.
S’ùrtimu nàschidu de su 2022 si narat Daniele, nàschidu a sas deghe de sero (h 22,00) de su 31 de nadale, duas oras in antis de finire s’annu. Su primu nàschidu de su 2023 si narat Francesco, imbàtidu pròpiu cando sa prima die de ghennàrgiu fiat finende, a mesanote mancu cuartu (h 23,43).
Daniele est su primu fìgiu de Valentina Corda e de Paolo Sechi, chi bivent in Aristanis, e at pesadu 2 chilos e 62. Francesco, segundu fìgiu de Tiziana Onnis e de Federico Scano de Prammas-Palmas Arborea, at pesadu 3 chilos e 74. Ambos duos sunt nàschidos cun partu naturale e anestesia peridurale e istant bene, gasi comente sas mamas.
Sa Asl de Aristanis dat a ischire chi in su 2022 at nàschidu in s’ispidale Santu Martinu 440 pitzinnos (18% cun trincu tzesàreu, in lìnia cun sos istandard de Agenas). Su repartu, in prus de pònnere unu lìmite a su nùmeru de partos fatos cun trincu tzesàreu, favoresset su partu naturale in fèminas chi ant giai tentu unu partu tzesàreu.
Sa provìntzia de Aristanis tenet su nùmeru prus bassu de nàschidos in Itàlia (4,9 onni milli abitantes, a s’annu) e una de sas edades prus artas pro sas mamas (prus de 33 annos). Custa cosa est andende a in antis dae annos meda, però s’ispidale Santu Martinu sighit a dare una sèrie de servìtzios e de propostas chi lu faghent semper prus cualificadu.
In su 2022 su repartu de Ginecologia e Ostetricia, dirìgidu dae sa dotora Francesca Campus, at torradu a aviare sas vìsitas acumpangiadas in sas salas de partu pro permìtere a sas fèminas gràidas de connòschere cun tempus servìtzios, ambientes e personale chi las at a retzire. Sas famìllias chi sunt isetende pitzinnu, duncas, podet bìere sas salas de partu noas, fornidas de sos mègius dispositivos dae sa poltrona pre-partu as sa “pelvic ball” a su banchitu olandesu a s’ispigru tripositonal, finas a sa possibilidade de tènnere un’acumpangiamentu musicale rilassante seberadu dae sa partòrgia.
Chie cheret prenotare una vìsita ghiada podet telefonare a su nùmeru 0783-317250.
(GF.P.)
