Custu mesi arruint duas ricurrèntzias chi pertocant is lìnguas:
su 23 de cabudanni s’afestat sa Giorronada Internatzionali de sa Lìngua de is Sinnus (e de is surdus) e su 26 cussa Europea de is Lìnguas.
Sa primu est una ricurrèntzia bòfia meda de s’Organizatzioni de is Natzionis Unidas in su 2017, sceberendi custa dii po mori ca in sa matessi in su 1951 ndi iant pesau sa Federeratzioni mundiali de is surdus.
Sa punna de custa dii est cussa de amparai totu is deretus umanus de sa comunidadi de genti chi no intendit, in mesu a totu ponit in contu s’agiudu de sa genti surda po sterri cali si siat paperi chi ddus tocat, oteni servìtzius educativus aposta cun sa lìngua de is sinnus e s’amparu de sa lìngua de is sinnus in sa diversidadi linguìstica e culturali sua.
Is lìnguas de is sinnus funt lìnguas chi veìculant is sinnificaus cun unu sistema a còdixi de sinnus de manus, de sa faci e de is movimentus de sa personi. Est una lìngua bera cun una strutura e sintassi.
Sa lìngua de is sinnus mudat cunformat a is comunidadis de is surdus in su mundu: a diferenti natzioni torrat diferenti sistema de sinnus, in Itàlia sa Lìngua de is Sinnus (LIS) est diferenti, po nai, de cussa de sa Frància (LSF) o de su Brasili (LIBRA).
Sa Giorronada Europea de is Lìnguas dda at procramada su Contzillu de Europa cun su patrocìniu de s’Unioni Europea su 1 de su mesi de idas de su 2001 e arruit su 26 de cabudanni.
Sa punna cosa sua est cussa de sensibilizai a is tzitadinus a sa diversidadi culturali e linguìstica de s’Europa e a incorai s’amparu de is lìnguas siat a mannus che a pipius, in s’atòbiu de Barcellona in su 2002 si fiant pigaus s’incàrrigu de fai imparai a is pipius assumancu duas lìnguas, cunvintus ca sa diversidadi linguìstica fessit aina bella po connosci mellus is culturas europeas e po afortiai su prurilinguismu.
Sa Giorronada europea de is lìnguas rapresentat un’ocasioni po celebrai totu is lìnguas impreadas in Europa (chi funt prus o mancu 225), contendi finas cussas prus pagu chistionadas e finas sa lìngua sarda.
Duncas incoraus a totus a chistionai o a valorizai in àteru modu s’impreu de sa lìngua nosta.
