Arruint una afatu de s’àtera.
Su 15 de su mesi de ladàmini arruit sa Giorronada Mundiali de is Fèminas de Sartu chi at istituiu s’Assembrea Generali de is Natzionis Unidas in su 2007 po sensibilizai s’opinioni de sa genti de su traballu de is fèminas de sartu chi ònnia dii depint parai faci a sa poburesa, sa discriminatzioni de gèneri, s’abusu e violèntzia sessuali, a s’intrada limitada a is resursas e a is servìtzius de fundamentu, a s’assistèntzia sanidària, a sa pagu oportunidadi de pigai parti a is decisionis polìticas e sotzialis in una comunidadi.
Epuru custas fèminas funt una fortza in s’economia globali. In parti manna de sa Terra is fèminas de sartu funt responsàbilis de sa produtzioni de su mandiari, de su manìgiu de is resursas naturalis e portant in antis is traditzionis e sa cultura locali. A bortas su traballu insoru tocat finas àteras fainas comenti a su tessìngiu e s’artigianau.
Su 16 arruit invècias sa Giorronada Mundiali de s’Alimentatzioni chi at istituiu s’Organizatzioni de is Natzionis Unidas po s’Alimentatzioni e sa Messaria in su 1979, custa giorronada punnat a sensibilizai s’opinioni de sa genti po assegurai a totus su mandiari.
In sa Terra nci at genti meda chi sighit a sunfriri su fàmini, in prus is mudaduras de su clima e su sperdìtziu in sa cadena cummerciali no agiudant po nudda su sistema. A una parti nci at genti meda chi sighit a morri de fàmini a s’àtera nci at genti chi cumbatit contras a s’obesidadi.
Duncas tocat a onniunu de nosu a fai sa diferèntzia sceberendi su mandiari chi sighit sa natura e circendi de non nci scavuai nudda.
