Su 9 de cabudanni arruit sa Giorronada mundiali de sa sìndromi fedu-arcòlica e distrubbus cosa sua (FAS) istituida in su 1999 po ammanniai sa connoscèntzia de is arriscus chi si tenint bufendi àrculus candu una est prìngia.
S’àrculu est una sustàntzia tòssiga chi nci passat in sa burba e lompit a su fedu a su matessi tanti de cussu de sa mamma, sceti ca custu ùrtimu non tenit nisciuna capassidadi de ddu immartiri inferrendi in sa pratzimenta cellulari, aturendi sa crèscida e fadendi dannu a is òrganus, po su prus su cerbeddu, tantu chi sa FAS est sa primu nexi connota de retardu mentali in su pipiu e acoa candu est mannu.
In prus podint acontessi anomalias struturalis (in sa carròcia o in sa crèscida) e distrubbus de su svilupu neurològicu chi ocasionant disabilidadis cumportamentalis e nèrbiu-connitivus, custus trastocus s’ammostant a manera diferenti ocasionendi scuncòrdius chi tzèrriant FASD (Fetal Alcohol Spectrum Disorder).
Sa FAS si podit preveniri donendi a is fèminas informus giustus, medas funt cunvintus ca a bufai pagu binu, birra, licori, aperitivu arcòlicu e superarcòlicu una borta ònnia tanti non fait nudda, sa beridadi est ca no esistit su tanti seguru e duncas a non bufai arcòlicus est s’unica bia de pigai.
