Gente meda mèrcuris 28 de nadale in Aristanis pro sa Festa de s’Atlètica provintziale organizada dae su Comitadu F.I.D.A.L. capitanadu dae su presidente Giuseppe Stara.
In s’àula de su Cussìgiu de su Comune, su movimentu atlèticu provintziale at onoradu a sos atletas, siat giovaniles siat master, chi in s’annu agonìsticu coladu si sunt distintos in àmbitu provintziale e regionale. Prèmios finas pro Lorenzo Patta (ritiradu dae s’allenadore suo) e pro Jhonatam Maullu, campiones aristanesos in àmbitu natzionale e internatzionale.
Sos reconnoschimentos los ant retzidos finas sos tècnicos e collaboradores, sos giùighes de gara, sos incarrigados de sas fotografias e su “staff” mèdicu: onniunu pro s’incàrrigu suo, tèsseras importantes in sa crèschida de su movimentu atlèticu in s’Aristanesu.
A sa manifestatzione b’ant partetzipadu finas su presidente de su Comitadu regionale F.I.D.A.L. Sergio Lai, su sìndigu de Aristanis Massimiliano Sanna cun s’assessore a s’Isport Antonio Franceschi, e su cussigeri regionale F.I.D.A.L. Flavio Sulas. Fiant presentes, est craru, finas sos dirigentes e tècnicos de sas sotziedades aristanesas.
S’elencu cumpletu de sos premiados si podet lèghere incarchende in su link chi sighit:
https://www.oristanonoi.it/wp-content/uploads/2022/12/Elenco-Atleti-Premiati2022.pdf
(GF.P.)
