S'Istitutu Stòricu Arburensu (ISTAR) incìngiat ocannu sa primu editzioni de su prèmiu de poesia “Eleonora in sarda rima”, in nòmini e onori de sa judighissa Leonora de Arbarei.
Si chistionat de unu cuncursu literàriu a tema sighendi sa mètrica sarda cun sa bidea finas de incorai s'impreu de is lìnguas de Sardigna (su sardu in totu is variedadis suas, su gadduresu e tataresu, su tabarchinu e s'aligheresu).
Su Prèmiu est partziu in tres setzionis segundu a is formas de sa rima sarda.
Su cuncursu ponit in contu prèmius po is bincidoris e s'inserimentu insoru me in s'Antologia de su Prèmiu.
Podint pigai parti a su cuncursu totu is chi bolint e sena de pagai nudda, bastat a nci mandai, aintru de mesunoti de s'8 de martzu de su 2024, su traballu (mai pubricau o mai intregau a àterus), a s'indiritzu de posta eletrònica eleonorainsardarima.istar@gmail.com.
S'autori, in prus de ai firmau cun nòmini e sangunau sa poesia, nci depit mandai paris cun su traballu suu, un'annota arremonendi is datus anagràficus suus (candu e innui est nàsciu, anca tenit sa residèntzia, su nùmeru de telèfonu, s'indiritzu de posta eletrònica e còdixi fiscali) e ponendi a craru sa setzioni anca bolit pigai parti.
Si podit pigai parti a una setzioni sceti e unu sceti depit essi su traballu.
Totu is traballus ant a abarrai a s'ISTAR chi s'at a fai meri e at a tenni su deretu de ddus publicai o de ddus impreai.
At a tocai a una Giuria Tècnica a sceberai a is bincidoris e su giudìtziu suu non at a fai a ddu murrungiai.
Su prèmiu a is bincidoris s'at a giai in sa manifestatzioni de acabbu, su 28 de abrili de su 2024, in su teatru Garau de Aristanis, in ocasioni de Sa Die de sa Sardigna. A is bincidoris ddus ant a avisai in tempus a telèfonu o a posta eletrònica.
Po ndi sciri de prus bai a su giassu www.istar.oristano.it
