Sa band sarda Niera, chi sonat de prus de dexi annus, at presentau in custas diis su discu nou “Andalas Noas”. Est unu traballu chi aunit su pop-rock e sa lìngua logudoresa e chi at biu sa partecipatzioni de àterus artistas sardus: Bertas, Maria Giovanna Cherchi e Gino Marielli de is Tazenda chi at scritu a manu de pari cun sa band “Non ti ch’andes”.
Tra is fainas de prus importu de sa carriera de i Niera, arregordaus ca in su 2015 iant abertu su cuncertu de Caparezza a Mondo Ichnusa, innantis a prus de 60.000 personas. Sunt arribaus a su de ses postus in sa de 30 editzionis de Sanremo Rock, ancà iant pigau parti prus de 850 grupus de totu Itàlia, marchendi s'identidadi insoru cun su cantu in lìngua sarda.
Est una band nodida non feti in Sardegna; bastit a pensai ca ant fatu de pagu unu cuncertu in Belgiu, òspitis de s'Assòtziu sardu Cuàturu Morus, chi at tentu sucessu mannu agiudendi a spainai su rock sardu in limba, a foras de su stadu italianu.
Est de pagu mòviu su tour nou de is Niera; in custas diis sunt stètius in Piemonti, fadendi connòsciri aici a su pùblicu piemontesu calincuna cosa de sa lìngua e de sa cultura sarda. .
