In tempus de gherra in sa costa a faci a bentuestu de sa Sardigna, ndi iant pesau unu sistema de posta de defensa costiera.
Iant afortiau po su prus sa linia de defensa in su tretu de mari chi andàt de Aristanis finas a Arborea, sendi custu puntu de sbarcu acanta meda a sa bia maista de sa Sardigna, sa Carlu Felici e a sa bia ferrada Casteddu-Macumere.
Is fortinus, connotus finas comenti a “bunker”, ddus iant pesaus siat costa-costa e siat prus aintru de terra po castiai is bias.
Serbiant po parai faci a is cannonadas de is navis, a is sbarcus nimigus ma finas po ddus cassai candu avantzànt a intru de terra po mori ca is fraigus si cuànt beni in su logu.
De fortinus nci ndi at de duus tipus: su monoarma e su pluriarma, ospidàt unu sordau su primu e duus sordaus su segundu.
Est de carcestrutzu e a strutura circulari, mesu interrau o acotzau a s’arroca, Aintru ddui capiat un’arma sceti, po su prus fusili o una mitralliatrici a tres peis, in sa pluriarma ddui capiàt finas unu cannoni anticarru 47/32.
A ladu de foras si biiant sceti cobertura a cimbòriu e feritòrias, po su prus cuàturu, bortas meda in mesu a sa modditzi po ddu cuai mellus, ma àteras puru fiant is strategias po non ddas fai biri.
Nci ndi at a unas fatas a muru de matoni e a cobertura a tèula, a ventanas frassas pintadas in su muru, in Santa Justa, po ddas pigai comenti a domu anca biviàt genti; àteras ddas ant pesadas acanta de nuraxis, in Cirras; a unas ddas ant pesadas in ortus privaus po fai crei de essi unu stàulu po ainas, in Arborea. Àtera strategia fiat cussa de ndi dda pesai acanta de turri spanniola, comenti in Marceddì.
Is fortinus in sa costa aristanesa funt de su 1942/43, su tretu fiat longu agiomai 25 chilòmetrus movendi de Crabas finas a Marceddì.
Po ndi ddus pesai iant tzerriau duas impresas de su logu, fadendi traballai 409 operàius e giai 100 militaris. Iant usau carcestrutzu mentras is ventaneddas po sparai fiant afortiadas a ferru po oprigai is defensoris. Is gennas fiant po su prus de linna
Su fortinu de Cirras portat is stampus de una mitralliada, custu fait pensai ca mitralliadas de americanus, ingresus e tedescus nci ndi funt stètias mancai non s’agatint documentus chi atestitant atacus aposta.
Oindii is fortinus, po su prus, ddus ant lassaus a perdi, àterus ddus ant sciusciaus po alladiai bias, àterus funt tupaus de matas.
