Arguai a nci scavuai su pani!
Candu me in domus incapitàt de abarrai pani, seguru fiat ca non nci ddu fulliànt a s'àliga.
Custa est una ritzeta simpri chi biit a protagonista su pani tostau o abarrau de sa dii in antis:
- su pani (civraxu, cocoi o su chi boleis) bolit segau a fitas,
- a fita a fita tocat de nci ddu ghetai a ammoddiai in sa pingiada de àcua buddendi,
- una borta scolau beni de s'àcua tocat a ddu sterri a pillu in unu tianeddu,
- stèrriu su primu pillu de pani tocat a ddu cundiri cun bànnia e casu finas a ddu ammantai.
Aici, a pillus a pillus, finas a acabbai su pani.
Custa est sa ritzeta de fundamentu ma a logus o a famìllias podit mudai: nci at genti chi usat su brou de petza intamis de s'àcua buddendi, ma finas genti chi ddu inforrat in antis de si ddu papai o chi arridat su pani in antis de ddu ammoddiai o chi ddi ghetat unu ou cotu asuba.
Po non chistionai de sa bànnia chi podit essi cun petza o sceti a tamàtiga cun is aciuntas, chi mellus creint, de allu, cibudda, laueru, tzìpiri, afàbica, ollu ermanu e sighendi. Chistioni de gustus!
Mudat finas su nòmini de custu mandiari, a logus candu est apena fatu si tzèrriat “supas” e candu est torrau a calentai (e totu morigau po non s'atacai a sa pingiada) ddi narant “matzamurru”. A logus est sceti “matzamurru” o sceti “supas”.
Arguai a nci scavuai su pani!
