S’ISTEMMA
Aprovadu e cuntzèdidu cun decretu de su Presidente de sa Repùblica de su 10 de cabudanni 1982. "Istemma de prata cun un’àrbore istilizadu cun fògias birdes e sas raighinas. Ornamentos esteriores de Provìntzia".
In su 1977, sa Giunta Provintziale, cun sa punna de frunire sa Provìntzia noa de un’istemma, at afidadu a prof. Giuseppe Pau s'incàrrigu de aprontare tres botzas, ognuna cun una frase e sa documentatzione istòrica. Sigomente unos cantos amministradores pensaiant ca s’istemma de sa Provìntzia de Aristanis non podiat èssere cussu de su Giuigadu de Arborea, prof. Pau at cumpiladu sa de bator notas, pro ispiegare s’ "istemma de Arborea" chi est in s'editzione de sa "Carta de Logu" a incuru de Giovanni Maria Mameli De'Mannelli (Roma 1805).
SU GONFALONE
Cuntzèdidu cun su matessi decretu de su Presidente de sa Repùblica de su 10 de cabudanni 1982. "Drapu biancu frunidu de ricamos in oro cun s’istemma descritu in su paràgrafu in antis cun s’iscritzione ‘Provincia di Oristano’ in oro, posta in mesu. Sas partes in metallu e sos cordones ant a èssere dorados. S'asta verticale at a èssere rivestida de velludu biancu cun bulletas doradas postas a ispirale. In sa fritza at a èssere rapresentadu s’istemma de sa Provìntzia e in su cambu intzìdiu su nùmene. Cravata e nastros tricolores dae sos colores natzionales cun fràngias de oro".
(MM)
