Su sìndigu de Aristanis Massimiliano Sanna at firmadu s’ordinàntzia pro proibire coetes e isparos de cale si siat tipu in totu su territòriu comunale dae sa mesanote de su 30 de nadale a sa mesanote de su 6 de ghennàrgiu 2023.
“Finas ocannu cunfirmamus una règula de tziviltade fata pro amparare su bene istare de sos sugetos dèbiles e de sos animales, ca sa tropu mùida los assustat – ispiegat su sìndigu Sanna -. Tocat a nàrrere chi onni annu b’at gente meda chi pedit custu provedimentu chi, ponimus in craru, no est ebbia pro agiuare sos animales. Ammentamus, difatis, chi a proibire coetes e isparos serbit a evitare infortùnios a sa gente chi los impreat sena atentzione, e chi sa mùida chi faghet a tìmere sos animales podet resurtare perigulosa finas pro gente dèbile comente sos pitzinnos, sos betzos e sos malàidos, ca lis càusat istress psico-fìsicu”.
Chie non rispetat s’ordinàntzia at a èssere multadu cun una multa amministrativa dae 25 a 500 èuros.
(GF.P.)
