In Aristanis s’Annu Nou 2023 s’at a festare in Pratza de Citadi (‘piazza Eleonora’) paris cun Emis Killa.
Su Comune de Aristanis at invitadu pro Annu Nou su rapper lombardu, chi est impignadu in unu tour pro su de 10 anniversàrios de “L’Erba Cattiva”, unu de sos album chi at cambiadu s’istòria de su rap italianu e at cunfirmadu una borta pro semper Emis Killa comente unu de sos artistas prus apretziados e connotos. Cun custu giru Emis Killa torrat a sos cuntzertos in presèntzia, a pustis de sa publicatzione in su mese de trìulas de s’ùrtimu branu suo “Lucifero”.
“Epuru-epuru, a pustis de duos annos de pandemia, podimus saludare s’annu nou cun una festa bella in pratza – annùntziat su sìndigu Massimiliano Sanna -. Amus a fàghere de totu pro assegurare un’ispetàculu de livellu artu, comente sos de sas sas primas tzitades sardas, e podet èssere finas un’ocasione de promotzione turìstica e econòmica pro sa tzitade e pro sos operadores econòmicos nostros”.
“Puntamus subra de un’artista afirmadu, apretziadu meda dae totus ma in manera particulare dae sos giòvanos – narat s’assessore a sa Cultura e a s’Ispetàculu Luca Faedda -. Su giru de cuntzertos permitit a Emis Killa de torrare a cantare in presèntzia, a pustis de sa publicatzione in su mese de trìulas de s’ùrtimu branu “Lucifero”. Pròpiu in custas chidas su tour est in Milano e est totu prenotadu. Cherimus una festa bella pro ismentigare sos vìnculos de su Covid e comintzare su 2023 in sa mègius manera. At a èssere finas un’ocasione bella pro fàghere promotzione a s’immàgine de Aristanis e pensamus chi b’at a àere gente meda chi at a seberare sa proposta nostra benende dae totu sa Sardigna”.
Su Comune de Aristanis cheret un’ispetàculu printzipale in Pratza de Citadi (‘piazza Eleonora’) e un’àteru cun discoteca in foras, cun programma ancora de definire. Emis Killa at a cantare sos branos prus connotos e sos chi sunt in s’album (discu de plàtinu 2012) “L’erba cattiva”, in ue b’est sa hit “Parole di ghiaccio” (discu dòpiu de plàtinu).
“Totu sos artistas sunt afetzionados in manera particulare a unu perìodu – narat Emis Killa presentende s’ispetàculu -. A su sòlitu est su de su cambiamentu, cando dae unu momentu a s’àteru su nùmene tuo curret dae una buca a s’àtera, finas de sos chi non ti connoschiant in antis. Su tempus meu de s’oro est de seguru su 2012 e in manera particulare custu discu m’at batidu fortuna e m’at afortigadu comente artista. Oe nch’at passadu deghe annos, e no podìamus dare perunu onore. Apo seberadu de lu torrare a cantare in presèntzia in ue est comintzadu totu, cando mi pariat chi milli persones in suta de su palcu esserent meda. Nos bidimus in cue”.
Biografia
Emis Killa, pseudònimu de Emiliano Rudolf Giambelli, nàschidu in su 1989, in su 2007 at partetzipadu a su cuncursu “Tecniche perfette”, in ue at bìnchidu su tìtulu de campione italianu de freestyle. At comintzadu a publicare sos primos traballos, “Keta Music” (2009), “Champagne e spine” (2010) e “The Flow Clocker Vol. 1” (2011). In su 2011 at publicadu su discu “L’erba cattiva”, e su branu sìngulu “Parole di ghiaccio”, at bìnchidu su “Best Italian Act” in sos Mtv Europe Music Awards e su “Best New Artist” in sos Mtv Hip Hop Awards. In su 2013 est essidu s’album “Mercurio” chi cuntenet sa hit de istiu “Maracanã”. Est s’ùnicu italianu chi at partetzipadu a unu de sos eventos hip hop prus connotos in su mundu, su Bet Hip Hop Awards. Dae su 2013 a su 2016 at dirìgidu “One Two One Two” in Radio Deejay e “Goal Deejay” in Sky. In su 2015 at dirìgidu sos Mtv Awards e at publicadu “Keta Music Vol. 2”. In su 2016 est istadu unu de sos giùighes de sa de bator editziones de The Voice e a fine de annu at publicadu “Terza Stagione”. A s’agabbu de su 2017 est essidu “Linda”. In s’istiu de su 2018 at publicadu sa hit radiofònica “Rollercoaster” e a pustis su branu sìngulu “Fuoco e benzina”, inseridos ambos in s’album “Supereroe” sighidu dae “Supereroe – Bat Edition”, antitzipadu dae “Tijuana”. In su mese de làmpadas de su 2020 at ghiadu “YO! Mtv Raps”, sa versione italiana de su programma mìticu de MTV USA dedicadu totu a sa mùsica rap. Su matessi annu at firmadu cun Sony Music Entertainment e su 18 de cabudanni at publicadu s’album “17” cun Jake La Furia, tzertificadu discu dòpiu de plàtinu e antitzipadu dae su branu sìngulu “Malandrino”, tzertificadu discu de oro. Su 26 de freàrgiu 2021 est essidu su repack de s’album “17 - Dark edition”. In su 2021 at publicadu su mixtape “Keta Music vol.3”, tzertificadu discu de oro e capìtulu tres de sa saga chi at caraterizadu e acumpangiadu totu sa produtzione de su rapper.
(GF.P.)
