In Aristanis su 18 de làmpadas si torrat a fàghere sa “Rotary corre”, sa cursa de benefitzèntzia chi si faghet in su tzentru istòricu e chi tenet su patrotzìniu de s’Assessoradu a s’Isport de su Comune de Aristanis.
Sa de ocannu est sa de ses editziones e est dedicada a sos protagonistas de sa cursa, professionistas, amantiosos e gente comune chi in custos chimbe annos ant fatu crèschere sa “Rotary corre” pro more de su Rotary club, Rotaract e Interact de Aristanis.
Sa finalidade printzipale de sa “Rotary corre” de ocannu est a comporare una pedana e 2 cadreas a rodas pro pitzinnos disàbiles, chi pro more de custa atretzadura ant a pòdere fàghere sas garas de ischerma.
Sas iscritziones, in sas dies in antis de sa gara, si podent fàghere in:
- ADIDAS STORE, carrera Tirsu n° 130 – Aristanis
- STILNOVO LA MURRINA , carrera Diegu Còntini n° 22 – Aristanis
- THARROS CAFFE’, carrera Tharros, 27/29 – Aristanis.
Su calendàriu de sa manifestatzione est custu:
- a sas 4 (h 16,00) in pratza Roma iscritzione e ritiru de petorinas e pacu-gara pro sos chi partètzipant a sa gara cun cumpetitzione;
- a sas 4 (h 16,00) in pratza Eleonora iscritzione e ritiru de petorinas e pacu-gara pro sos chi partètzipant a sa gara sena cumpetitzione;
- A sas 7 e mesa (h 19,30) aviu de sas garas e, a sa fine, premiatzione.
Ant a èssere premiados sos primos deghe classificados in sa gara de cumpetitzione, siat in sa categoria maschile siat in sa categoria feminile.
Su Rotary e su Rotaract Club Interact de Aristanis torrant gràtzias pro s’agiudu, in manera particulare, a su Tzentru Isportivu italianu, a su Marathon Club de Aristanis, a sa Prociv-Arci de Aristanis e a s’Assòtziu Isportivu Diletantìsticu de Promotzione Sotziale Sea Scout.
Gràtzias meda a sos isponsor, chi ant permìtidu de fàghere custa editzione: Crai F.lli Ibba, Vestis, Grupu Melis, Sanidade Ambientale, Costa Ovest, Manival, Azienda Agrìcula Falchi, Dispensas, Ortofrutta, Tharros Caffè, Ottica Santona, L’Orto di Eleonora, Serra Profumeria, Da Banana Ristorante Craf, La Bottega delle carni maselleria Pisano, Unique, Stilnovo La Murrina, Pensieri d’Oro, Ricci Case, Pizzeria Tom & Jerry, Sinis Wash, Piroddi Arredamenti, Serra pelletteria, Leoni Aldo auto, Maurizio Picciau istùdiu de radiologia, Automania, Publicem.
«Sa “Rotary corre” dae un’annu a s’àteru s’est trasformende in un’atopu isetadu dae atletas e amantiosos – ponet in evidèntzia Adriana Muscas, presidente de su Rotary club de Aristanis e podista connota – e est bellu a bìere chi in custa die, pro more de s’isport, resurtamus a otènnere aìnas chi megiorant sa comunidade, agiuende in manera particulare sas categorias prus dèbiles».
(GF.P.)
