Su comunu at aprovau una delìbera chi stabilessit cali sunt is critèrius de su progetu “Adota una pastera”.
S’initziativa nascit po ascurtai s’esigèntzia de is tzitadinus de Aristanis, de fai prus àreas birdis.
Is tzitadinus duncas ant a podi presentai propostas po is àreas chi iant a bolli a fai diventai birdis, e acrarendi cun ita iant a bolli cuncordai is logus acanta a is domus insoru, ( vasus de froris, pasteras, banchinas) donendi atentzioni chi peroa su logu anca s’ant a pònniri custas cosas, permitat cumentisisiat a totus de sighiri a gosai de cussu logu.
A si ocupai de custaas atividadis podint èssiri is tzitadinus a solus e assotziaus, is assòtzius de volontariau, culturalis e sportivus, is iscolas, cundomìnius e atividadis econòmicas.
Is chi s’ant a ocupai de gestiri is àreas birdis, s’ant a dèpiri fintzas interessai de limpiai su logu, de nci bogai s’àliga, de pudai is matas chi ndi tenint abisòngiu, de ndi segai s’erba chi strobat, de prantai matixeddas nobas.
Su comunu at a pensai a pònniri calincunu strexu po s’àliga e a ddus sbuidai, de donai materialis e ainas e de furniri fintzas unu impiantu po acuai, chi serbit.
A custus logus depint podi sighiri a intrai totus is tzitadinus. At a fai a pònniri fintzas targas de annàgratzias o cartellus de publicidadi po is atividadis cummertzialis.
Annu po annu una giuria sceberada dae su comunu at a detzidi cali at a èssiri s’àrea chi s’est scerada po bellesa, originalidadi, incuru. E a cussu logu s’at a donai su tìtulu de giardinu de s’annu, paris cun unu prèmiu detzìdiu cun delìbera de sa Giunta comunali.
