Est bessiu su programma de su Festival “Desiderabili futuri. Senza disuguaglianze, per un mondo sostenibile” promòviu de Legacoop Sardegna,Forum Disuguaglianze e Diversità e Dromos Festival, cun s’agiudu de Legacoop Nazionale e AsviS chi s’at a fai in Aristanis dae su 26 a su 29 de làmpadas de su 2024.
Cuatru diis de atòbius, laboratòrius e cunferèntzias, bisitas ghiadas e ispetàculus po promovi unu cunfrontu de esperièntzias tra chi fait e chi istùdiat; a pitzus de sa temàtica de sa disagualidadi chi sèmpiri de prus s’est spainendi in totu su mundu. Po fàiri nàsciri ideas chi agiudint a arresolvi problemas e a agatai is solutzionis.
Unu Festival duncas chi ponit impari momentus de anàlisi e aprofundamentu ma tenit in contu fintzas su deretu de su praxeri e de su stai impari cun is àterus.
Su Festival difati oferrit spetàculus cun artistas nomonaus, bastit pensai a sa cantanti Noemi; sunt in programma bisitas po connòsciri is bellesas naturalis, culturalis e enogastronòmicas de su territòriu.
Ònnia giornada at a èssiri intregada a una chistioni difarenti: su traballu giustu e dinnitosu, siguru e coperativu; is polìticas pùblicas chi pensint a is logus; sa transitzioni ecològica; s’Europa chi at a èssiri sa chistioni de importu de sa mesa tunda de s’acabbu.
Ant a pigai parti a su festival Vittorio Agnoletto, Fabrizio Barca, Luca Bianchi, Susanna Camusso, Luigi Di Marco, Simone Gasperini, Rita Ghedini, Piero Ignazi, Ota De Leonardis, Stefano Massini, Ilaria Portas, Andrés Rodriguez-Pose, Marco Rossi-Doria, Giacomo Spissu, Eleonora Vanni, Edoardo Zanchini.
Me in is diis de s’eventu is bias e is pratzas de Aristanis s’ant a mudai in una tzitadi de su Festival e ant a acùlliri finas is istand de is casifìcius e de is cantinas stòricas de sa Sardigna, avalorendi aici s’enogastronomia de su territòriu.
In su programma de su Festival est insertada sa manifestada sportiva “Power of Sport”, chi bolit marcai s’importàntzia de s’atividadi sportiva che aina de inclusioni sotziali. Prus o mancu cuatruxentus atletas s’ant a sfidai in garas ufitzialis de nàdidu, tiru cun s’arcu, tennis-tavolo e àteras atividadis de giogu.
Po scoberri totu su programma, podeis sighiri su link innoi.https://www.forumdisuguaglianzediversita.org/wp-content/uploads/2024/06/PROGRAMMA_Festival-Desiderabili-Futuri.x19511.pdf
