At a nàschere in Aristanis su tzentru didàticu regionale de sos Vìgiles de su Fogu. S’àrea in ue s’at a fàghere est cussa a curtzu a s’edifìtziu de su Cumandu provintziale. Cun su progetu esecutivu giai aprovadu e cun sas litzèntzias giai dadas dae su Comune, como s’at a pòdere fàghere sa gara pro intregare sos traballos.
Sa protzedura est istada longa e dificultosa e b’ant tentu parte su Ministeru de s’Internu (Dipartimentu de sos Vìgiles de su Fogu), su Cunsòrtziu Industriale de Aristanis, s’Agentzia de su Demàniu e su Comune de Aristanis.
S’ispesa totale est agiomai de 4 milliones de èuros e, de custos, 700mìgia sunt giai postos pro comporare su terrinu, pro sas chircas geognòsticas e pro istèrrere su progetu esecutivu.
“Dae cando so imbàtidu a Aristanis – cummentat su prefetu Fabrizio Stelo – apo gherradu pro chi sas protzeduras burocràticas, chi fiant firmas, esserent cumpletadas cantu primu e in sa mègius manera”.
Pro s’interventu b’at a chèrrere carchi annu de traballu e previdet de fàghere unu palatzu de tres pranos in ue b’at a àere un’àula magna pro 100 corsistas e 25 aposentos pro 60 postos a corcare; in prus unos cantos logos cumplementares pro s’atividade isportiva chi devent fàghere sos vìgiles de su fogu.
“So cuntentu meda de su resurtadu chi amus otentu – agiunghet su prefetu -. Est unu traguardu importante meda pro sos vìgiles de su fogu, pro sa tzitade de Aristanis e pro totu sa Sardigna. Torro gràtzias a totus comintzende dae su Cunsòrtziu Industriale, ca est un’òpera bene ordimingiada pro dare a sos vìgiles de su fogu nostros, chi sunt fenomenales, una professionalidade in prus e a su matessi tempus torrat a pònnere in evidèntzia s’importàntzia geogràfica de sa tzentralidade de Aristanis in sa Sardigna. De seguru b’at a chèrrere carchi annu pro finire s’òpera, ma semus resurtende a bìere sa lughe in su tunnel, comente si narat in custas ocasiones”.
(GF.P.)
