In Aristanis dae chenàbura 4 de santandria sunt torradas a comintzare sas caminadas pro si mantènnere in forma e amparare sa salude.
Bi podet partetzipare sa gente chi tenet prus de 65 annos, si faghent duas bortas a sa chida e non si pagat nudda, bastat de tènnere sa tèssera Uisp.
S’initziativa naschet pròpiu dae Uisp, in s’àmbitu de su progetu natzionale Sportpertutti art. 72, pro dare a sa gente sa possibilidade de caminare paris in itineràrios predispostos e acumpangiados dae unu tècnicu educadore Uisp.
Cun su progetu “Sportpertutti” Uisp cheret valorizare s’isport e s’atividade fìsica, ca los ritenet trastos de importàntzia manna pro imbàtere a sos obietivos de Agenda 2030, cun atentzione particulare a sas tzitades. Sa punna est de permìtere a totus, finas in momentos de crisi, de otènnere sos vantàgios dados dae s’isport e dae s’atividade fìsica.
Sas caminadas si faghent su mèrcuris e sa chenàbura in oràriu 11,30-12,30 e 15,00-16,00.
Pro nd’ischire de prus si podet telefonare a su nùmeru 347 250 8506 o mandare una mail a s’indiritzu de posta eletrònica oristano@uisp.it.
(GF.P.)