In pratza Roma, in Aristanis, ocannu puru torrant a allumare s’isteddu. De s’ispesa si nd’at a incarrigare s’amministratzione comunale, chi non cheret rinuntziare a sas lughes de Nadale nointames sas bulletas incaridas meda. In sos meses colados su Comune nd’aiat fatu istudare sos faros chi daiant lughe a sos monumentos printzipales de Aristanis (e in mesu de custos sa màgine de Lionora), pro dare unu signale de rispàrmiu.
In Terraba, imbetzes, ant a allumare ebbia sas lughes de s’abete mannu de sa pratza de sa Sea. “Ocannu amus a rinuntziare a sas lughes in sas carreras – at annuntziadu su sìndigu Sandro Pili -. Giòbia sero, pro s’Immaculada, amus a allumare ebbia sas lughes de s’àrbore”.
S’àrbore ispantosa, bene mudada a festa, dae annos meda est un’atrativa: in tempus de Nadale gente meda andat a Terraba dae sas biddas a làcana pro la bìere.
“Torro gràtzias a sas atividades produtivas e a sa Pro Loco: – sighit Pili –amus aviadu paris una regorta de dinari pro parare fronte a sas ispesas de s’àrbore, de sos mercadeddos de Nadale e de sas atividades pro sos pitzinnos. Est unu signale bellu de unione de sa comunidade, semus dende unu messàgiu de isperàntzia”.
In Santa Giusta sas lughes sunt giai postas: “Ocannu puru in pratza de sa Sea b’at un’àrbore de lughes – at naradu su sìndigu Andrea Casu -. Amus detzìdidu de torrare a pònnere sas lughes, mancari prus pagas contra a sos annos colados, ca dant unu signale de isperàntzia. S’augùriu est de imbàtere cantu primu a sa paghe in Ucraina, de parare fronte a sa crisi econòmica causada dae sa crèschida de sas ispesas pro energia e carburante, e de finire luego sa pandemia de Covid-19”.
Ilartzi imbetzes at a rinuntziare a sas lughes de Nadale. “S’Amministratzione comunale at detzìdidu de non nde pònnere – at ispiegadu su sìndigu Stefano Licheri -. Semus dispràghidos meda, ma sa crisi chi semus bivende, causada dae sa crèschida de sas ispesas pro s’energia, est nudda in paragone de sa gherra in Ucraina. Pensamus a sas peleas mannas de cussa gente”.
Pro sas festas, in sa bidda de Guilcier ant a torrare a allumare nessi sos lampiones de s’illuminatzione pùblica chi nde sunt istudados dae carchi mese, pro limitare sas ispesas de sas bulletas. “Dae sa chida chi intrat totu sos lampiones ant a èssere torra allutos – at finidu Licheri – e ant a abarrare allutos pro totu su tempus de sas festas”.
(GF.P.)
