Pro afestare sos chimbanta annos de sa denominatzione DOC Malvasia de Bosa, pro su 09 de austu in sa tzitadina de Planarza sunt cuncordende sa prima editzione de Calici sotto le stelle/Càlighes suta sos isteddos. S’Amministratzione comunale at postu sa manifestatzione in sa programmatzione de s’istiu e in custa ocasione at a èssere cunsignada a Bosa sa Bandera de sas Tzitades de su Binu. Pro custu anniversàriu de importu est postu in programma fintzas unu cunvegnu chi ddu at a leare parte su coordinadore Regionale Giovanni Antonio Sechi e s’iscritore e giornalista de enogastronomia Gilberto Arru.
A sa manifestatzione b’ant leare parte s’Assòtziu Strada del Vino Malvasia e sas Cantinas de su territòriu chi, dae sas 07.00 de sero a sa 01.00 de note, in su Cursu Vittorio Emanuele, in sa parte istòrica de sa tzitadina, ant a fàghere connòschere sas caraterìsticas e ant a fàghere tastare sa Malvasia de Bosa DOC e àteros binos locales a totu sos chi ant a partetzipare. A custos assàgios ghiados ant a partetzipare fintzas àteras Cantinas chi produint calidades de binu a Denominatzione de Orìgine.
(MM)
