Sàbudu su 4 de maju de su 2024 torrat in Crabas s’eventu Certe luci non puoi spegnerle, cuncordau dae s’assòtziu chi tenit su matessi nòmini e chi nascit po arregordai Giacomo Meli, su piciocu de 29 annus feti, mortu me is annus passaus po una maladia. S’eventu est organizau gràtzias finas a su patrocìniu de su comunu de Crabas e a s’agiudu de àterus assòtzius chi si òcupant de preventzioni e assistèntzia a is malàdius oncològicus: Airc, Lilt, Komunque Donne, Le Belle Donne, Abbracciamo un sogno, Nastro viola.
Meda ant a èssiri is artistas chi ant a èssiri presentis sa dii. A movi de is ses de merì, sfilada a ingìrius de is bias de sa bidda cun grupus folk e de màscheras ( Boes e Merdules de Otzana, Cambas de linna de Gùspini, Sos Colonganos e s’Urtzu de Austis, Donna Zenobia de Macomer, Sos Corriolos de Neoneli, S’Urtzu e sos Bardianos de Ula, Gigantes de Sennori). A arriciri is òspitis at a èssiri su grupu folk de is iscurtzus de Crabas acumpangiau dae su grupu folk de Biddobrana. A sighiri mùsica sarda cun Galusé, A ballare e su grupu Is launeddas de su Sinis de su maistu Stefano Pinna.
Dae is noiras de merici in su palcu strantaxau in sa Pratza Sturzo àtera mùsica cun Bujumannu feat Sista Namely e Isla sound, cun is Tazenda trio, su spetàculu de Luca Martelli, su fire show de Gionata Feuer Frei. e sa mùsica dance de su dj Davide Spanu.
In totu is bias eis a agatai cosa de papai e de bufai; finas in custu casu su dinai arregortu at a andai in beneficièntzia.
In sa pratza e me in is bias acanta eis a agatai finas is stand de is àterus assòtzius chi ant a fai informatzioni e preventzioni e finas is operadoris de su tzentru de arrecuperu de su Sinis chi ant a fueddai de s’importàntzia de smenguai s’impreu de sa plàstica e de s’efetu chi tenit a suba de s’ecosistema terrestri.
At a fai a intrai a su spetàculu pone.ndi.nci una oferta aintru a unas cantu tecas chi eis a agatai in sa pratza. Ant a serbiri po comporai finas unu camper po sa preventzioni, unu mesu fruniu finas de unu mammògrafu po agiudai in sa preventzioni e po lompi me in is logus chi sa genti, po sa cunformatzioni de is territòrius insorus, tenint prus dificultadi a fai abbisitas mèdicas.
