Frussio, una bidda de unos 500 abitantes, est connota pro s’arte de cosire s’isciareu (Asphodelus microcarpus) pro nde fàghere crobes, cherrigos, canisteddas e àteros istèrgios fintzas prus ‘modernos’. Sunt sas fèminas chi, dae sèculos, si dèdicant a custu traballu in s’oras chi abarrat dae sas cosas de fàghere in domo e pro sa famìllia. Si in beranu si passat in custa bidda de Pianàrza, càpitat de bìere in sas istradas e in sas pratzas màtzulos de isciareu postu a assutare; imbetzes, in s’istiu, a dae in antis de sas domos si podent ammirare (e comporare) sos traballos fatos cun passione, cumpetèntzia e arte.
Comente in totu sa Sardigna, in su sartu de Frussio, creschet s’isciareu chi pro diventare una canistedda o una crobe cheret ischidu traballare e preparare pro ddu cosire. S’isciareu si tirat in sos meses de martzu-abrile, in antis chi abèrgiat su frore, chi ispargat, cando su cambu faghet a ddu traballare ca est modde ma non tropu. Sos cambos tirados, pro una bintena de dies o unu mese si lassant a matzuleddos in foras, in su sole a assutare. A pustis s’isperrant de longu e si lassant ancora in su sole e cando sunt assutados bene si faghent comente faschinas, sos mannùgios o màtulos, e si remonent in giassos assutos. In antis de ddos traballare, pro ddos pòdere impreare e cosire, si ponent in s’abba pro unas 5 oras. Sa die in fatu, sos cambos si dividint in tres parte: sas corrias nieddas (chi est sa parte esterna), sas corrias biancas (sa parte de mesu) e sas matas (su coro de su cambu). Sas corrias – biancas e nieddas – si cosint in pitzu de sas matas chi abarrant cuadas in suta de sos disegnos fatos cun sas corrias seberadas in sos colores diferentes: colore de nintzola, colore de castàngia craru e oscuru. Pro fàghere custos istèrgios non s’impreat àteru materiale: isciareu ebbia.
A Frussio, in su 2015, ant abertu unu museu dedicadu a custa arte.
MUDAS (MUseo Diffuso dell’Asfodelo
Indiritzu: carrera Nazionale, 91 – Frussio
Telèfono: 339 231 6862
Posta eletrònica: museoflussio@gmail.com
(MM)
