In sa domo, chi est in s’istradone de Ilartzi, Antonio Gramsci at bìvidu dae su 1898 a su 1911, dae sos sete a sos binti annos, e a custa domo torraiat cando, prus mannu, biviat in Torinu o àteras tzitades. Sa mama, Pepina Marcias, fiat originària de Ilartzi e sa domo fiat de sa sorre concuina.
Su museu est in sos ses aposentos de sa domo, postos in sos duos pianos chi, mancari sos acontzos apat cambiadu cosas meda, tenet sas caraterìsticas de sas domos antigas ilartzesas: sa domo de su forru, s’ortu cun s’impedradu e sos muros in contones de basaltu, s’iscala pro pigare a su primu pianu posta acanta de s’intrada printzipale, su putzu a intro de domo in sa coghina, sa cannitzada. De sa domo e de sa bidda, Antonio Gramsci at iscritu bortas meda in sas lìteras chi mandaiat a sa mama e a sas sorres, su prus a Teresina.
In su Museu ddue sunt cosas chi fiant de Antonio Gramsci, comente libros, giogos, sas pagellas, ogetos chi teniat in presone, ma fintzas documentos, fotografias, artìculos de giornales; in pannellos mannos si podent lèghere lìteras chi aiat iscritu dae sa presone a sa mama o a sa sorre Teresina.
In su Museu sunt postas in mustras òperas de pintura dedicadas a Gramsci chi sos artista, fintzas famados, ant donadu a sa Domo; si podent fintzas ascurtare e abbaidare sas testimonias de chie at connotu a Gramsci e cun issu at cumpartzidu ideas e esperièntzias (Sandro Pertini, Ignazio Silone, Umberto Terracini e àteros); sunt documentàrios, intervistas e documentos in contu de sa vida de custu òmine polìticu connotu in totu su mundu.
Ainas informàticas sunt a disponimentu de sos bisitadores pro consultare sa versione digitale de sos Cuadernos dae sa presone / Quaderni dal carcere iscritos dae Gramsci.
Ddue sunt impedimentos architetònicos ma sos disàbiles, pro abbaidare in sos aposentos de susu, podent impreare ainas informàticas, posta in su pianu de terra.
In su Museu si podent comporare libros ( de sas òperas de Gramsci, istùdios de àtere in contu de sas òperas suas, de argumentos polìticu-sotziales chi issu teniat a coro) e ogetos, comente cuadernos, cuadreddos, bursas, mallieddas e àteru.
Domo Museu de Antonio Gramsci
Istradone (Cursu Umberto I) 57 – 09074 Ilartzi (Aristanis)
Informatzione, oràrios, prètziu de sos billetes e prenotatziones:
Telèfono e fax : +39.0785.53075
Posta eletrònica: info@casamuseogramsci.it
Servìtzios educativos e laboratòrios didàticos:
didattica@casamuseogramsci.it
Servìtzios amministrativos:
amministrazione@casamuseogramsci.it
museo@pec.casamuseogramsci.it
Situ web: www.casamuseogramsci.it
Facebook: www.facebook.com/casagramscighilarza
(MM)
