Su Museu de s'Immàgine e de su Disegnu Interativu de Norghiddo, dedicadu a s’immàgine in totu sos aspetos suos, est ùnicu in totu sa regione. Su M.I.D.I. promovet s'arte contemporànea, cun atentu a s’importu, a su chi est su fumetu in su mundu artìsticu. Sa novidade manna de su museu est ca sos bisitadores podent connòschere s’istòria de custa arte leende in manos fumetos de època e fintzas tenende a disponimentu sos istùdios de disegnos e iscenegiaduras de cunfrontare intre domos imprentadoras e artistas de èpocas diferentes.
Sos chi bìsitant su museu podent abbaidare e lèghere sos materiales custoidos in su museu, aprofundire sa letura de sos comics, dae sos prus connotos a sas publicatziones noas e, in una sala atretzada, si podent seberare dvd de bìere o partetzipare a projetziones programmadas. In su museu b’est una mustra permanente e fatu fatu si cuncordant mustras temporànea e initziativas chi marcant sa funtzione de s'immàgine in sos campos diferentes de s'arte, de sa cultura, de s’istòria e de sa sotziedade.
Gràtzias a sas publicatziones regortas in su MIDI si podent connòschere mègius sos istiles artìsticos diferentes: su de sa Panini, de sa Marvel, de Bonelli, cussu de sos Manga, su de Manara, romanzos istòricos a fumetos e àteros meda, sardos e no.
Dae su mese de maju su museu tenet unu parcu cun percursos a tema cun pannellos didàticos, istàtuas mannas de sos personàgios de Peanuts imbentados e disegnados dae Charles Schulz e murales cun disegnos de àteros personàgios connotos meda: Diabolik, Corto Maltese, Lupo Alberto, Eva Kant, Valentina, Tex Willer. Cun àteros murales a fumetos peri sa bidda, Norghiddo contat, e at a sighire a contare, s’istòria sua.
Su museu cuncordat laboratòrios didàticos e bìsitas guidadas.
Informatziones
Indiritzu: guturinu San Giovanni, s.n.c. - 09070 Norghiddo
Telefoneddu: +39 347 3846907
Oràrios:
LUNIS 09:00-13:3
MARTIS 09:30-14:00
MÈRCURIS 09:30-13:30 e 16:00-19:00
CHENÀBURA 16:00-19:00
SÀBADU 09:30-13:30
DOMÌNIGA 16:00-19:00
Pro intrare si pagat su billete.
Posta eletrònica: midi.norbello@gmail.com
culturaistruzione@comune.norbello.or.it
Facebook: www.facebook.com/midinorbello
(MM)