S’11 e su 12 de santugaine Sabarussa at afestadu unu de is produsimentos de primore chi tenet: sa garnatza.
Su Comune de Sabarussa, cun s’agiudu de su Distretu rurale Giuigadu de Arbaree, de sa Regione Sarda, de sa Fundatzione de Sardigna e de s’Assòtziu de is Entes locales pro is Fainas culturales e de ispetàculu, paris cun sa Pro Loco e is assòtzios e comitados sabarussesos, at cuncordadu duas dies prenas de addòbios dedicados a custu binu nòdidu.
In su programma ricu b’est istada fintzas un’àtera faina de s’Isportellu de sa limba sarda de sa Provìntzia de Aristanis (Avisu R.A.S. - Tu.Li.S. 2024): una mesa tunda intitulada Sa garnatza intra de connotu e modernidade, coordinada dae Antoni Nàtziu Garau, operadore de s’Isportellu provìntziale. In s’addòbiu, in sardu, ant faeddadu de garnatza is espertos Roberto Puggioni, enòlogu de sa Cantina de su Remèdiu, Enrico Marceddu, agrònomu e co-autore cun Mario Tendas de su libru Garnatza. S’oro de sa Badde de su Tirsu, e s’on.le Salvatore Cau, consigieri regionale e imprendidore de su setore vitivinìculu.
