Su 2022 in Sardigna finit in àrias de beranu. In custas dies nch’at a àere carchi nue arta, ma su 31 de nadale e sa prima die de annu nou s’ìsula at a tènnere ancora temperaduras artas.
A tenore de su chi previdet s’Ufìtziu Mèteo de s’Aeronàutica militare de Deximumannu, sas temperaduras ant a èssere de 21 grados prus o mancu, màssimu in sas costeras.
“In su Mediterràneu sighint sas cunditziones de istabilidade atmosfèrica pro efetu de unu campu de pressione arta chi permitit de ammassare umididade in sos pìgios prus bassos e de formare pìgios bassos e nèula – ispiegant sos meteròlogos de s’Aeronàutica -. In sas dies chi benint sas cunditziones ant a abarrare firmas e ant a passare nues artas. Pro su 31 amus a tènnere una die de sole cun temperaduras màssimas de 21 grados prus o mancu, est a nàrrere 4 grados in prus contra a sas mèdias de custu tempus. Su bentu at a bènnere dae sos cuadrantes meridionales”.
Pro bìere unu pagu de ierru at a tocare a isetare su fine de chida de sos Tres Res, cando ant a bènnere sas primas abbas dae sa parte orientale. “Ma sas temperaduras – antìtzipant sos espertos – ant a abarrare firmas in sos 18-20 grados”.
Ispetantis sa nèula de su mangianu cullegada a sa pressione arta e a sas temperaduras prus artas de sa norma sunt benende a èssere normales, màssimu in su Campidanu e in sa parte meridionale de s’Ìsula.
(GF.P.)
