Dae su 29 a su 31 de trìulas 2022 in Turre Manna b’ant a èssere sas partidas de su BT 100 Èolo Beach Contest Proxienergy 2022, chi apartenet a su calendàriu mundiale de sa Federatzione Internatzionale de Tennis.
Su pùblicu at a pòdere assistire a sas garas intre atletas chi benint dae Itàlia, San Marino, Frantza e Ìsula de La Reunion, Portugallu, Germània, Ucraina, Olanda, Ispagna, Argentina.
Giogadores e giogadoras ant a disputare sas garas in su dòpiu maschile e feminile e s’ant a gherrare una bìnchida de 10mìgia dòllaros e produtos tìpicos sardos.
Aristanis e Turre Manna sunt intre sas tres localidades protagonistas in Itàlia cun sa bìnchida prus arta.
Intre sos nùmenes connotos italianos bi sunt Luca Andreolini e Filippo Boscolo, Niccolo Strano e Marco Faccini, Federico Galeazzi ed Edoardo Ponti. Intre sas fèminas chi ant cunfirmadu sa presèntzia Noemi e Michela Romani, Giulia Renzi e Greta Giusti, Irene Mariotti ed Elena Francesconi.
A unu tempus cun su BT 100 Èolo Beach Contest Proxienergy 2022 s’ant a fàghere finas sos torneos FIT de 4° categoria e Open “Al naturale”: dòpiu maschile, dòpiu feminile, dòpiu mistu. B’at a àere finas logu bundante pro sos prus giòvanos, sos atletas sardos de su setore Under ant a pòdere giogare unu torneu Under 14, dòpiu maschile e dòpiu feminile.
Sebastiano Cau, presidente ASD Èolo Beach Sports, at presentadu sa manifestatzione in una cunferèntzia de istampa: “Su tzircùitu ATP de su Beach Tennis torrat a si firmare in Aristanis. Si retzimus un’eventu mannu gosi est pro more de s’esperièntzia chi binti annos a como nos at bidu movende sos primos passos fraighende su movimentu tennìsticu regionale de ispiàgia pro balangiare una positzione rispetada intro de sa Federatzione Italiana Tennis cun sos nùmeros de s’Assòtziu nostru, riferidos a su tzentru giovanile nostru de aviamentu a s’isport, s’iscola de Beach Tennis, s’iscuadra agonìstica chi tenet bona chedda de rapresentantes de sas categorias U12-14-16-18 e unu nùmeru mannu de campionados organizados in su tzentru isportivu nostru chi oramai est connotu e apretziadu in totu Itàlia”.
“S’idea de s’assòtziu nostru est istada semper de provare, annu cun annu, a megiorare su chi faghìamus s’annu in antis – at sighidu Diego Fratini, organizadore e responsàbile Èolo Beach Tennis -. In su 2021, s’Èolo Beach Contest Proxienergy at batidu a Turre Manna sos mègius atletas natzionales. Su livellu est altu e echilibradu meda, a su puntu chi est dificultosu a cumprèndere chie tenet sos nùmeros pro bìnchere. S’isperàntzia est chi carchi atleta nostru resurtet a si pònnere in evidèntzia, mustrende de pòdere imbàtere a sos livellos prus artos”.
Pro Luca Faedda, Assessore a su Turismu de su Comune de Aristanis, “Isport e turismu sunt un’abbinamenu naturale, tantu prus si su panorama est che su de Turre Manna cun su Golfu de Aristanis chi si biet in fundu. Totu sas manifestatziones aparitzadas in Turre Manna in custos annos ant mustradu chi custu abbinamentu funtzionat e finas custa borta, cun sos campionados internatzionales de tennis de ispiàgia, no at a mancare de assegurare resurtados bonos meda pro sa promotzione turìstica e pro su balàngiu econòmicu. Su Comune at semper sustènnidu a Èolo, chi at mustradu de èssere unu motore sena fine de ideas, progetos e initziativas”.
“Comente Assessore a s’Isport, ma prus ancora comente òmine de isport, devo fàghere sos cumplimentos a sos organizadores de Èolo pro custa isfida noa – at naradu Antonio Franceschi, Assessore a s’Isport de su Comune de Aristanis -. Pro fàghere unu torneu internatzionale cun belle 200 partetzipantes de livellu artu meda bi cheret capatzidade de organizare e professionalidade chi no est de totus. Calidade chi totu su grupu de Èolo at mustradu bortas meda de tènnere. Sas dies chi benint Turre Manna at a ospitare garas de livellu artu a beru”.
Su programma
Chenàbura 29 de trìulas: cualificatziones e “sedicèsimos” Main Draw ITF
Sàbadu 30 de trìulas: ITF MD – WD + FIT Open e 4° cat.
Domìniga 31 de trìulas: finales ITF + finales FIT Open e 4° cat.
Su live
Dae su merie de chenàbura 29 de trìulas e pro sas duas dies de sàbadu 30 e domìniga 31, sas partidas giogadas in sos campos printzipales las ant a trasmìtere in direta e cun cummentu tècnicu in sas pàginas Facebook Èolo Beach Tennis Il Contest, Directa Sport Tv e in su canale Youtube de Directa Sport Tv.
Su tennis de ispiàgia in Aristanis est presente finas in Instagram in su profilu @Èolo Beach Tennis.
(GF.P.)
