Sa lege n. 482 de su 15 de Nadale de su 1999, Normas in matèria de tutela de sas minorias linguìsticas istòricas, in s’artìculu 1 narat ca:
sa limba ufitziale de sa Repùblica est s'italianu e ca sa Repùblica, chi avalorat su patrimòniu linguìsticu e culturale de sa limba italiana, favoresset fintzas sa valorizatzione de sas limbas e de sas culturas amparadas dae sa Lege 482 etotu.
In s’artìculu 2 narat ca:
sa Repùblica tutelat sa limba e sa cultura de sas populatziones albanesas, catalanas, germànicas, grecas, islovenas e croatas, sas chi faeddant su frantzesu, su francu-proventzale, su friulanu, su ladinu, s'otzitanu e su sardu.
Sas populatziones albanesas, arribadas in Italia cun migratziones dae su de XV a su de XVIII sèculos, bivent in Sitzìlia, Calàbria, Basilicata, Campània, Pùllia, Molise e Abrutzo.
Sas populatziones germànicas bivent in s’arcu alpinu.
Sas populatziones grecas sunt in Aspromonte e in Salento.
Sas populatziones islovenas sunt in Friuli.
Sos croatos chi faeddant sa limba amparada dae s’Istadu sunt in tres biddas de su Molise: Acquaviva Collecroce, Montemitro e San Felice.
Su catalanu si faeddat in s’Alighera, in Sardigna.
Su frantzesu si faeddat a manera ufitziale in sa Badde de Aosta.
Su francuproventzale si faeddat in sa Badde de Aosta, in sos montes de sa provìntzia de Torinu e in duas biddas de sa Pùllia: Celle San Vito e Faeto.
S’otzitanu si faeddat in unos cantos logos in Piemonte ma fintzas in Guàrdia piemontesa in Calàbria.
Su ladinu ddu faeddant in Trentinu e in provìntzia de Boltzano e su friulanu, su prus, in Friuli.
Su sardu ddu faeddant in Sardigna, in ue si faeddat fintzas su tataresu, su gadduresu e su tabarchinu chi non sunt amparados dae sa lege 482/99.
(MM)