Non sunt ancora imbàtidos sos 400mìgia èuros chi serbint pro finire sos traballos cullegados a sa viabilidade e a su servìtziu de su tzentru intermodale nou de Aristanis. A custu puntu su tzentru diat pòdere abèrrere a fine de ierru, mancari in martzu, ma ebbia comente parchègiu pro sa gente chi biàgiat in trenu.
Pro l’istrinare a beru at a tocare de isetare ancora. Dae Palatzu de sos Iscolòpios narant chi in sas chidas imbenientes forsis s’at a pòdere serrare su collàudu. Finidu s’iter, ant a èssere disponìbiles nessi sos giassos pro firmare sas veturas e in custa manera at a megiorare su tràficu de su cuarteri de Santu Efis, pro chi pratza Ungheria noa apat unu pagu de respiru.
Pro como mancant sa “rotonda” de fàghere in carrera Marrocu, sas istradeddas e s’impiantu de illuminatzione pùblica intre s’intrada de su tzentru intermodale in carrera Ilartzi e sa rughe de caminu chi nche leat a carrera Marrocu.
S’amministratzione capitanada de su sìndigu Massimiliano Sanna est isetende dae tantos meses su dinari, ma dae Casteddu pro como non b’at novas. Su Comune est finas pensende de antitzipare su dinari cun finantziamentos diversos.
Sos traballos pro sa viabilidade de intrada a su tzentru sunt pretzisos pro permìtere a sos bus de passare. Cando ant a èssere finidos, su tzentru intermodale at a pòdere funtzionare de a beru.
(GF.P.)
