Dae su 10 de austu a su 30 de santugaine 2022 in s’Antiquarium arborense b’at a èssere sa mustra “I devoti sofferenti di Neàpolis”.
Sa mustra, chi comintzat mèrcuris 10 de austu a sas 7 de sero (h 19,00) cun una cunferèntzia de s’archeòlogu Raimondo Zucca, contat s’istòria de sa tzitade de Neàpolis, tzentru nuràgicu chi teniat raportos econòmicos cun Filisteos, Fenìtzios, Grecos e Etruscos intre su sèculu XII e su sèculu VI a.C.
In sos ùrtimos annos de su sèc. VI a.C. sos Cartaginesos si nde sunt impossessados e b’ant postu unu emporion, unu mercadu, chi in pùnicu teniat su nùmene de “mqmhadash” (‘logu nou de mercadu’) e in grecu Neàpolis. In su portu b’ant fraigadu unu santuàriu dedicadu a una divinidade sanadora, forsis subra unu logu sacru nuràgicu, in sa foghe de su frùmene sagradu.
Raimondo Zucca at a ammentare s’iscoberta fata in s’àrea de Neàpolis in su 1973: “deghinas e deghinas de bìculos de màgines pùnicas de devotos suferentes, fatas a manu dae artesanos locales: òmines e fèminas, nudos, aboghinende a sa divinidade sa suferèntzia issoro pro tènnere sanamentu dae sas maladias (marcadas dae sa postura de sas manos). Fiat unu depòsitu votivu de unu templu collocadu in sa parte perifèrica setentrionale de Neàpolis, a curtzu a su portu dedicadu a una divinidade de sa salude.
Andende a in antis cun sas chircas, sas màgines agatadas (intreas o a frichinidas) sunt imbàtidas a 532. Su prus sunt traballadas a manu, ma bi nd’at 18 fatas a tòrrinu, b’at màgines votivas chi rapresentant partes anatòmicas (ancas, su prus), màgines fatas a sestu, taulitas de terracota, còngios chi rapresentant una cara”.
Sa mustra est aparitzada dae sa Fondazione Oristano e dae s’Assessoradu a sa Cultura de su Comune de Aristanis e si podet bìere in s’Antiquarium arborense dae su 10 de austu a su 30 de santugaine. Sos oràrios sunt sos chi sighint:
lunis-chenàbura: h 9,00-h 20,00
sàbadu e domìniga: h 9,00-h 14,00; h15,00-20,00.
Finas a su 30 de austu, essende·bi sa manifestatzione “Shopping sotto le stelle”, sa mustra s’at a pòdere visitare dae sas 9 a sas duas e mesa (h 4,30) e dae sas 5 e mesa a sas 11 (h 17,30-23,00).
(GF.P.)
