Est imbàtida a Aristanis puru sa rassigna “Palestra Letteraria”, nàschida in Casteddu in su mese de làmpadas pro more de su poeta e iscritore Andrea Melis. Bidu chi s’esperièntzia de Casteddu est andada bene meda, finas in Aristanis s’at a inaugurare sa segunda sede de sa “Palestra”, chi naschet in collaboratzione cun s’Assessoradu a sa Cultura de su Comune de Aristanis e cun sa Fundatzione Aristanis.
Sos Open Day de abertura s’ant a fàghere sàbadu 22 e sàbadu 29 de santugaine in sos locales de s’Hospitalis Sancti Antoni (carrera de Casteddu 157). At a èssere presente, paris cun òspites de importu e cun su fundadore Andrea Melis, finas carchi iscritu de sa sede de Casteddu, in ue dae unu mese si traballat onni lunis pro 3 oras, faghende esertzìtziu de iscritura.
“Sa palestra literària est unu progetu originale chi nos est agradadu meda dae sùbitu e chi est in lìnia cun sos programmas de s’Assessoradu e de sa Fundatzione Aristanis” ponet in evidèntzia s’assessore a sa Cultura de su Comune de Aristanis Luca Faedda.
Sa Palestra Literària est sa prima esperièntzia in Itàlia de unu logu dedicadu a chie cheret iscrìere. Est nàschida in su mese de làmpadas 2022 in su teatru “Intrepidi Monelli”, in su bighinadu casteddaju de Sant’Avendrace. Andrea Melis, comente un’istrutore de palestra, ponet a disponimentu de chie cheret imparare a iscrìere una sèrie de “trastos” pro allenare su talentu.
“In Casteddu b’at deghinas de autores e amantiosos impignados in progetos literàrios interessantes meda de narrativa, sagìstica e poesia – ispiegat Melis, poeta e iscritore, chi iscriet pro Feltrinelli e dae binti annos si òcupat de iscritura e de cultura -. Como tenimus una comunidade de gente ispantosa chi tenet dae sos 20 a sos 70 annos. Cherimus bìere comente at a rispòndere Aristanis a custu progetu”.
“S’apuntamentu una borta a sa chida in Palestra agiuat in antis de totu a dare sa motivatzione a sa gente pro finire sos progetos literàrios chi tenet, a finire cussos libros lassados in fundu de càssia, cussas poesias mai postas in òrdine, cussos contos de famìllia chi si diant pòdere trasformare in romanzu – agiunghet Melis -. A iscrìere in logu chi b’at finas àtera gente, a si pòdere bufare unu cafè e nàrrere duas paràulas est su segundu puntu de fortza de custa initziativa. A pustis de annos pesantes de distàntzia fìsica e mentale tocat a torrare a si dedicare a sos logos e a sas persones, a sa bellesa e a sa cultura”.
Sa Palestra Literària non si cheret pònnere a subra de sas iscolas de iscritura chi giai esistint, ispiegat Melis, ma antzis collàborat cun professores esternos chi agiuant a sos iscritos a fàghere crèschere su talentu issoro. In manera particulare Melis, comente “allenadore”, faghet de “puntòrgiu” a onni iscritu, lu sighit in sos progetos e aprontat percursos de allenamentu cussigende libros, film, cursos de iscritura e esertzìtzios chi a pustis si cumpartzint in sos atopos una borta a sa chida.
SU PROGRAMMA
Su programma de Aristanis previdet duos Open Day gratùitos abertos a totus (iscritores, giornalistas, letores, amantiosos de sos libros e apassionados) pro comintzare a connòschere su logu e sos òspites.
Sàbadu 22 de santugaine a sas 6 de sero (h 18,00) – Andrea Melis faghet unu resonu in direta vìdeu dae Nàpoli cun Lorenzo Marone (iscritore chi pùblicat pro Einàudi, Feltrinelli), Patrizio Zurru (editore e agente literàriu Arkadia). A pustis una mesa de cunfrontu cun Nadia Paddeu (redatora editoriale e “allenadora” literària), Melània Muscas (redadora editoriale e iscritora noitzola) e Valeria Usala (iscritora e “allenadora” literària, autora pro Garzanti).
Mesa de cunfrontu cun sos bendidores de libros aristanesos (Marina Casta – Mondadori; Mauro Canu – Libreria Canu; Davide Piras – Dorian Gray; Manuela Porcedda – Librid; Giorgia Littera in rapresentàntzia de sas bendidoras de su Punto Giunti).
Sàbadu 29 de santugaine a sas 6 de sero (h 18,00) – Andrea Melis at a resonare in direta vìdeu dae Roma cun Andrew Faber (poeta e iscritore, Rizzoli, Interno Poesia), Marcello Fois (iscritore, cummediògrafu e iscenegiadore) in cullegamentu dae Bologna, Ciro Auriemma (iscritore, redadore editoriale, “esploradore” literàriu), Eleonora Carta (iscritora e sagista), Maurizio Cristalla (organizadore culturale – Fiera de su Libru de Igrèsias, fèstival e rassignas), Giuditta Sireus (mànager culturale) e Alessandro Cocco (editore La Zattera e bendidore de libros).
(GF.P.)
