Martis 29 de santandria a sas 4 e mesa de sero (h 16,30) s’at a fàghere sa Festa de sa Munitzipalidade, s’eventu culturale nou propostu dae s’Assessoradu a sa Cultura de su Comune de Aristanis paris cun sa Fondazione Oristano, cun s’Archìviu istòricu comunale e cun su MuseoOristano.
Su tìtulu de sa cunferèntzia in programma est “L’elezione dei consiglieri nella Oristano città regia” e s’at a fàghere pro sa festa de Santu Andria apòstolu.
Sa Festa de sa Munitzipalidade s’est fata pro sa prima borta in su 2019 dae un’idea de su sìndigu Massimiliano Sanna (chi assora fiat assessore a sa Cultura). “Sa Festa de sa Munitzipalidade cheret èssere un’eventu culturale istitutzionale pro ammentare sa festa de Santu Andria, ca in cussa die onni annu in època aragonesa e ispagnola si faghiat s’eletzione de su Cussìgiu Tzìvicu de sa tzitade nostra” ispiegat su sìndigu Sanna.
“Sa manifestatzione – agiunghet s’assessore a sa Cultura Luca Faedda – cheret èssere unu reconnoschimentu a sa tzitade e a s’istòria sua, e finas a sas fèminas e òmines de cultura e de sas istitutziones chi ant dadu onore a sa comunidade nostra. Ocannu, pro more de sos documentos pretziosos de s’archìviu istòricu comunale, aprofundamus sos temas dedicados a s’eligidura de sos cussigeris in Aristanis tzitade règia”.
Sa cunferèntzia, introduida dae su sìndigu Massimiliano Sanna, a pustis de sos saludos de su presidente de su Cussìgiu comunale Giuseppe Puddu e de s’assessore a sa Cultura Luca Faedda, previdet sos interventos de sa responsàbile de s’Archìviu istòricu Antonella Casula e de sas archivistas paleògrafas de sa Fondazione Oristano Rossella Tateo e Ilaria Urgu.
(GF.P.)
