Torrant sos fogos artifitziales in S’Archittu e in Santa Caterina. Su primu ispetàculu s’at a fàghere in S’Archittu a mesanote de chenàbura 8 de trìulas, e in Santa Caterina su 17 de austu.
Custu de sas “bombas de gioja” est un’apuntamentu fissu in Santa Caterina: si faghet dae prus de vinti annos, imbetzes s’Archittu at comintzadu a los fàghere tres annos a como. Los organizat su Tzentru Cummertziale Naturale de Cùglieri, paris cun su Comune.
In su 2021 sa manifestatzione l’aiant fata in S’Archittu ebbia, sa de Santa Caterina l’aiant annullada a pustis de su disacatu mannu de su fogu, chi fiat capitadu pagas chidas in antis.
“Isperamus chi non tochet a annullare sos fogos artifitziales a s’ùrtimu momentu” at naradu su presidente de su Tzentru Cummertziale Naturale, Andrea Ponte. “Finas a como no amus tentu pàrreres contràrios: perìgulu de fogu non bi nd’at, ca los isparant dae sa balena de Turre de su Putzu a cara a mare”.
Custos apuntamentos de S’Archittu e de Santa Caterina sunt un’agiudu mannu pro s’economia, ca a sa gente lis agradant meda.
(GF.P.)