In su tzentru istòricu de Aristanis como faghet a andare in bitzicleta e in monopàtinu.
Sa Giunta Sanna at deliberadu chi dae lunis 24 de santugaine si podet torrare a andare in bitzicleta e in monopàtinu finas in carreras chi fiant vietadas, comente Sa Porta (‘piazza Roma’), guturinu Umberto I, carrera De Castro, guturinu D. Contini (giai inseridu cun atu fatu in antis), carrera Garibaldi (in su tretu intre Sa Porta e carrera Serneste / guturinu Garibaldi), carrera Parpaglia (intre Sa Porta e carrera Serneste / carrera Aquila), guturinu Iosto e Pratza de Citadi (‘piazza Eleonora’).
Sa delìbera e s’ordinàntzia dant dispositziones pro chi in carrera Umberto I sos pitzinnos finas a sos 6 annos potzant andare in bitzicleta bastat chi siant acumpangiados dae sos genitores, chi depent vigilare e istare atentos. Totu sos àteros tenent s’òbligu de si nde calare dae bitzicletas e monopàtinos e de los lassare firmos, bastat chi no diant infadu a chie passat.
Sos divietos e sos òbligos non sunt pro chie impreat màchinas pro servìtziu de politzia, semper mantenende totu sas atentziones pro non causare perìgulu.
“Sos divietos, in su 2017, fiant nàschidos comente esperimentu – narat su sìndigu Massimiliano Sanna -. Cunfrontende su chi capitaiat in antis cun su chi est capitadu a pustis aviados sos divietos de su 2017, amus bidu chi fiat netzessàriu a currègere carchi cosa, proibende ebbia s’intrada a sa Ruga Dereta (‘via Dritta’) in ue est craru chi s’impreu de bitzicletas e de monopàtinos creat problemas ca b’at gente meda chi andat a pee”.
“Sas règulas noas tenent caràtere isperimentale – crarit su sìndigu Sanna -. Isperamus chi, a pustis de custa abertura, sa gente si cumportet cun sabiore, rispetende sos pedones. Pro onni fatu sanu, ant a èssere sos agentes de Politzia locale a vigilare chi si rispetent sas règulas. Intantu, in custas dies amus a pensare a pònnere a postu sa signalètica, pro chi dae lunis 24 de santugaine sas règulas noas siant operativas de su totu”.
(GF.P.)
