Oe 16 de làmpadas 2022 a sas 7 de sero (h 19,00) in s’Antiquarium Arborense s’at a festare s’abertura de sa mustra “Su pòpulu de brunzu / Il popolo di bronzo”, unu biàgiu ammajadore in su mundu de sos brunzitos, pagu connotu ma importante meda pro s’istòria sarda.
Sos bisitadores ant a pòdere connòschere sos personàgios rafigurados in sos brunzitos: capos de tribù, “preìderas / sacerdotesse”, tiradores cun s’arcu, gherradores rapresentados a mannària de òmine dae s’artista Angela Demontis cun bestires, armas e ornamentos de su tempus issoro, tres mìgia annos a como.
S’artista at a èssere presente, paris cun su diretore Momo Zucca.
Sa mustra, aberta finas a su 30 de austu, est una a sas initziativas culturales patrotzinadas dae Fondazione Oristano paris cun s’Assessoradu a sa Cultura de su Comune de Aristanis, e tenet su marcu MIC chi garantit s’aprovatzione de su mundu de s’archeologia.
A pustis de sa bìsita s’at a fàghere unu cumbidu cun binu de sa “Cantina della Vernaccia”.
(GF.P.)
