Custu fine de chida (sa note intre sàbadu 29 e domìniga 30 de santugaine) càmbiat s’oràriu: amus a torrare a s’ora solare e sos rellògios ispostant sas lantzitas un’ora a dae segus.
At a èssere s’ùrtima borta? Chie cheret s’ora legale isperat chi emmo, a pustis chi sa petitzione pro pedire de non cambiare at tentu bona resèssida. Sa petitzione, in Change.org, l’aiat fata sa Sotziedade italiana de meighina ambientale (SIMA) e Consumerismo no profit, chi est unu giornale chi cheret difèndere sos consumadores.
Nàschida pro pedire sa pròroga de s’ora legale pro unu mese, sa petitzione at tentu belle 150.000 firmas in pagas dies e como est imbàtida a 300.000, duncas est una de sas prus firmadas in s’istòria de Change.org Itàlia.
Sos chi l’ant ideada narant chi, rinuntziende a s’ora solare, si diat risparmiare in contu de consumu energèticu, in prus de eliminare belle 200.000 tonnelladas de CO2 a s’annu.
In su 2019 su Parlamentu europeu aiat votadu pro eliminare su càmbiu, dende sa possibilidade a sos Istados de si regulare comente cheriant, seberende cale de sos duos oràrios mantènnere. S’Itàlia in su 2021 aiat seberadu de lassare su dòpiu oràriu e de fàghere ispostare sas lantzitas in beranu e in atòngiu.
(GF.P.)
