Is Mascareddas - Cumpangia Viagiante de Buratinos e Marionetas
presentat
DONI
Ispetàculu de narratzione de Betti e Donatella Pau cun pupatzos e ogetos
Cun Donatella Pau
Ogetos de s’iscena: Tonino Murru, Stefano Dallari
Marionetas e costumes: Donatella Pau
Iscenografia: Sonia Carlini
Mallieria: Maria Giovanna Cabiddu
A manera particulare si torrat gràtzias a James Davies de La Capra Ballerina,
Suntu
Ite est unu donu? Segundu Marcel Mauss, antropòlogu e istòricu de su sèculu passadu, est unu modu universale pro fàghere nàschere relatziones umanas e de fidàntzia intra de chie donat e de chie retzit su donu. Su donu, custu est seguru, andat in tundu ca totu torrat, comente in sas istòrias.
Unu contu de Grazia Deledda, unu contu de sos frades Grimm, unu contu de ambientatzione àraba e duas paristòria de sa traditzione populare chi contant s’atzione de su donu e s’ammaju chi dd’acumpàngiat.
In pagu logu iscènicu, cun una mesa e unu carillon, Donatella Pau contat sas chimbe istòrias e movet pupatzos e ogetos: una sennora betza retzit una vìsita chi no ispetaiat; su sero de Paschighedda unu pitzocheddu iscoberit su donu de sa vida; sa generosidade est sa richesa prus manna de unu maistru de iscarpas e de sa mugere sua; unu giòvanu innamoradu chi in prus de su sentimentu tenet fintzas su donu de s'imbentzione; una pitzoca giòvana retzit dae sa giaja su donu de ischire creare cosas cun sas manos suas.
Sas iscenografias sunt parte essentziale de sos contos e dant a beru s’idea de s’acoglièntzia de una domo, s’àera frita in dies de nie o su fragu bonu de su pane agigu bogadu dae su forru.
Un’ispetàculu dedicadu a su donu chi contat su significadu de su gestu: un'atzione sotziale chi acàpiat e unit, chi est lìbera in su sèberu e in su dda torrare e chi, a manera definitiva, est un’aspetu pretzisu de una cultura in relatzione cun sos àteros.
Is Mascareddas
Fundada dae Antonio Murru e Donatella Pau in su 1980, Is Mascareddas est una realidade culturale chi at contribuidu a fàghere connòschere e difùndere su Teatru de Figura in Sardigna, traditzione teatrale chi in s’ìsula fintzas a tando fiat connota pagu meda.
S’idea de base de s’atividade de sa cumpangia est chi su Teatru animadu dae sos buratinos est teatru chi tenet sa matessi dignidade de su teatru fatu cun sos atores.
Dae s’incomintzu de s’atividade sua sa cumpangia at tentu in Sardigna unu ruolu de importu pro sa difusione e connoschèntzia de su Teatru de Animatzione, imbentende e cuncordende progetos, fèstival, rassignas, cun cumpangias italianas e internatzionales. In su 1999 at inauguradu sa Biblioteca Yorick, una de sas regortas prus de importu de iscritos e documentos in contu de su teatru de animatzione in Europa (agiumai 4 mìgia volumes tra libros e rivistas de totu su mundu).
(MM)
