-
Alessia Orro at bintu sa medàllia de oru in is olimpiadis de ocannu a Parigi cun sa natzionali de pallavolu. Nascit in Narabuia in su 1996 e cumentzat sa carriera in una scuadra de Aristanis, s'Ariete. Cumentzat agoa a giogai in su campionau de serie A in su 2015 e immoi sighit a giogai in su campionau de prus importu cun su Monza. In su 2021 bincit cun sa natzionali su campionau europeu e inguni cumenti ocannu a Parigi arricit fintzas su prèmiu che pallegiadora prus brava.
-
Stefano Oppo est abbogadori; nascit in Aristanis ancà cumentzat s'atividadi sportiva in su tzìrculu nàuticu. At bintu medàllias meda in campionaus natzionalis, europeus e mondialis ma is chi arregordaus cun prus prexeri sunt cussas a is olimpiadis: a Tokio in su 2020, ancà at bintu sa medàllia de brunzu e ocannu a is olimpiadis de Parigi, ancà, paris cun su cumpàngiu suu est arribau segundu bincendi sa medàllia de prata.
-
Lorenzo Patta nascit e bivit in Aristanis, fillu de babbu e mamma de Samugheo. In su 2019 at bintu sa medàllia de prata in is campionaus europeus under 20. In su 2021 a is olimpiadis de Tokio bincit sa medàllia de oru in sa stafeta 4*100 paris cun Marcell Jacobs, Fausto Desalu e Filippo Tortu. In su 2023 at bintu sa medàllia de prata in sa stafeta 4*100 a is mondialis de Budapest.
