Antonio Corriga est stètiu unu de is prus rapresentantis mannus de s'arti sarda. Nascit in Atzara, una bidda chi in is primus annus de su Noixentus at arriciu bisitas de medas pitoris e artistas, prusatotu de natzionalidadi spanniola; bastit pensai a Eduardo Chicharro,Antonio Ortiz Echagüe,Cesareo Bernardo de Quiros e Del Castello.
Custu "andat e beni" de genti est stètiu de grandu importu po s'arti e su traballu de Corriga chi crescit abitendi custus artistas e cun sa presèntzia de òperas d'arti importantis.
De su 1935 a su 1941 Antonio Corriga si nci andat a Tàtari po frecuentai s'Istitutu d'Arti. In su 1941 - 42 partit militari e candu torrat a Tàtari si diplomat in s'Istitutu d'Arti.
In su 1943 si nci andat a Firenze po frecuentai s'Istitutu Superiori d'Arti "Magistero"; si diplomat in su 1944 e otennit fintzas s'abilitatzioni po fai su maistu de scola. Sèmpiri in Firenze frecuentat s' Acadèmia de Belle Arti.
De su continenti ndi torrat in Aristanis e innoi aberrit unu laboratòriu de ceràmica e fait su maistu in sa scola professionali dirìgia de Vincenzo Urbani. A pustis de unus cantu annus detzidit de si dedicai feti a sa pintura. Fait ritratus, pintat figuras sacras, traditzionis popularis, momentus de protesta sotziali.
At fatu traballus medas po fràigus sacrus; arregordaus s'incravamentu po sa crèsia de Fonni e sa Pala centrali de s'altari de su Santuàriu de Nostra Sennora de Bonària in Casteddu.
Est stètiu diretori po annus meda de I.S.O.L.A.(Istitutu Sardu Organizatzioni de su traballu Artigianali) e finas impinniau in polìtica; fadiat parti difati de su partidu sotzialista italianu. In su 2000 diventat diretori artisticu de sa Pinacoteca de Atzara. Innoi si podint ammirai unas cantu òperas de custu artista mannu de s'ìsula nosta.
Traballus medas ddus agataus in is ufìtzius de sa regioni, de sa provìntzia de Aristanis, de is Comunus de Aristanis e de Atzara e in sa sea de sa Comunidadi montana Barbagia Mandrolisai.
Corriga Morit in Aristanis su 16 de su mesi de idas de su 2011 a 88 annus.
