Bonaventura Licheri nascit su 18 de gennarxu de su 1668 in Neoneli. Est unu de is babbus de sa poesia in lìngua sarda. A issu si depit su testu de su cantu Deus ti salvet Maria (mellus connota che s'Ave Maria).
Intrat a piciocheddu in su collègiu de is Gesuitas de Santu Micheli in Casteddu e innoi cumentzat is istùdius chi sighit agoa in Tàtari, sèmpiri in unu collègiu.
Apustis de unus cantu de annus torrat a Neoneli e si cojat cun sa giòvana Cipriana Polla. In Neoneli at a bivi finas a sa morti, in su 1733.
In su 1700 trascrit in unu cuadernu is poesias, is gosos, is letras, e is litanias scritas finas a insaras. Ddas at a torrai a scriri apustis Antonio Demontis Licheri.
Connotu che poeta sacru, ddu testimongiat finas su fatu ca sa tzitadi de Aristanis ddi donat s'incarrigu a s'acabbu de su de dexiaseti sèculus de scriri is gosos de su Nòmini de Gesus in Gattigliano. Is òperas suas si spainant intra de in cunfrarias de totu sa Sardigna. Novas pagu craras apitzus de sa vida de custu poeta mannu, non si permitint de ddu agatai in totu is lìburus chi fueddant de stòria de Sardigna , dae cussus scritus de Alziator finas a is testus de Pirodda e Tola.
Feti stùdius prus nous fatus in is lìburus de sa crèsia de Neoneli, in s'Archìviu de Stadu de Casteddu e in s'Archìviu Romanu de sa Cumpangia de Gesus, ant permìtiu de donai a custu poeta su logu chi minescit in su panorama de sa poesia sagra de sa Sardigna.
