Vincenzo Peis, su prus santu adorau in totu sa Sardigna, nascit in Làconi in su 1701. Sa sua est una famìllia devota de massajus pòburus, alligrada dae s'arribu de noi fillus. Duncas non si podint fai brius, su chi sa mamma ponit in sa mesa est sèmpiri bellu. Vincenzo scioberat de andai a crèsia e pregai a su postu de andai a giogai cun is àterus pipieddus. Una dii si ammalàdiat meda e insaras fait una impromitèntzia; si at a sanai, s'at a fai para. Deus ddu ascurtat e Vincenzo non si ndi scarescit de s'impromitèntzia. Incapitat peroa ca in cuventu non ddu bolint casi ca est marrideddu meda e non scit ne lìgiri e ne scriri. Vincenzo peroa sighit a provai fintzas a candu unu cuventu francescanu ddu arricit cun su nòmini de Nàtziu.
Si nci andat duncas a Casteddu in su cuventu Buoncammino. Po totu sa vida percurrit a pei sa tzitadi domandendi sa lemùsina po is pòburus e is paras. Una faina difìtzili po unu chi no est andau a scola, non scit ne scriri e ne ligiri e fueddat feti su sardu. Epuru totus ddi bolint beni e duu arrispetant, tzerriendi.ddu su santixeddu. Fra Nàtziu est bistiu cun una saja, portat sa barba longa e bianca e andat a cratzolleddas siat in s'istadi e siat in s'ierru. Tenit sèmpiri una bèrtula a coddu po portai su chi ddi donat sa genti. Is pipius pòburus ddu acumpangiant prexaus po ddu intendi fueddai de Gesus, de su vangelu e po ascurtai is paràbbulas chi ddis parrint contixeddus e po àiri unu arrogheddu de pani. Gràtzias a issu genti meda si cunvertit. Si narat ca iat fatu miràculus meda. Duranti una caristia manna, Fra Nàtziu boddit perdas de terra chi andendi andendi diventant pani callenti. Un'àtera borta parrit chi su santu iat domandau a unu pastori carchi piscedda de casu ma issu dd'iat nau ca non fadiat; insaras is pisceddas de casu iant cumentzau a arrumbulai sighendi su para. E su pastori apustis de àiri biu custu miràculu, donat a su para totu is pisceddas de casu.
Fra Nàtziu morit in Casteddu in su 1781 a 80 annus e si narat ca genti meda est sanada dae is maladias gràtzias a s'intercessioni cosa sua. Is sardus ddu pregant fintzas che patronu de is istudiantis.
