Su 20 de martzu finit su tempus po presentai is traballus po sa primu editzioni de su prèmiu de poesia “Eleonora in sarda rima”, po arregordai sa figura fèmina de prus importu de sa stòria de Sardigna: juighissa, Eleonora d’Arbarei.
Su cuncursu literàriu, cuncordau dae s’Istar, at postu a curri po premiai is bincidoris, in totu 4 milli èurus. A su chi at a arribai primu, at a andai 1300 èurus. Mentras is chi ant a arribai primus in ònnia setzioni ant a binci 900 èurus onniunu. Is poesias chi ant a binci, s’ant a publicai in s’Antologia de su prèmiu de is poesias bincidoras.
A su cuncursu podint pigai parti totus, a indonu. Totu is chi pigant parti, depint fai arribai is traballus insoru mai publicaus e nimancu mai presentaus in àterus cuncursus, non prus a tradu de sa mesunoti de mèrcuris 20 de martzu. Is traballus tocat a ddus mandai sceti cun email a s’indiritzu eleonorainsardarima.istar@gmail.com
At a èssiri una giuria tècnica decìdia dae s’ISTAR a sceberai su bincidori; su presidenti de sa giuria at a èssiri Giancarlo Porcu (spertu de mètrica e filologia sarda)agiudau de Sebastiano Pilosu (etnomusicologu) e Roberto Caria (docenti in sa Facultadi Teològica de Sardigna).
Sa premiatzioni s’at a fai su 28 de àbrili in su Teatru Garau de Aristanis po sa festa de “Sa Die de sa Sardigna”.
