Cras, a is 9 oras de mangianu, s'Istitutu Tècnicu Industriali Òthoca de Aristanis at a acòlliri su de 4 atòbius de su “Job Day” Sardigna 2024 chi at bòfiu s'Assessorau regionali de su Traballu e s'ASPAL (Agentzia sarda pro su traballu), po ammanniai is ocasionis de oferta o circa de traballu.
Incìngiat s'eventu Maika Aversano, Diretora Generali de s' ASPAL.
Is “Job Day” funt deretus a tzitadinus, impresas e studiantis po:
-
donai s'oportunidadi a chi donat traballu e a chi ddu circat de si podi atobiai apari po si connosci e inghitzai una collaboratzioni,
-
agiudai a is personis a arreconnosci s'ìndula, cumpetèntzia e motivatzionis insoru,
-
fruniri ainas futas po circai traballu e donai calìfica noba professionali,
-
donai orientamentu e cunfrontu a pitzus de sa vida e de su traballu apustis su diploma e làurea,
-
contai s'oferta formadora biatza de su territòriu e is traballus de su benidori.
At a arribai genti meda chi at a abbisitai is bangus anca is impresas ant a parai is ofertas de formatzioni e traballu. Ant a pigai parti finas is classis IV e V de is istitutus superioris de totu sa provìntzia interessadas a connosci prospetivas po su benidori insoru.
Is Tzentrus po s'Impiegu de Aristanis, Abas, Bosa, Cùglieri, Ilàrtzi, Mòguru e Terraba ant a fruniri a is impitadoris e studiantis informus e agiudu totu sa dii.
Nci ant a essi finas is Universidadis, is agentzias formadoras, is Istitutus tècnicus superioris, is istitutzionis e is Fortzas Armadas chi ant a proponni is progetus, cursus de formatzioni e programmas insoru. No ant a ammancai seminàrius e cunvènnius, anca ant a pigai parti espertus, consulentis e formadoris, comenti a Stefano Cucca, Davide Curreli, Fabiana Andreani, Cristian Basciu, Massimiliano Melis, Giovanni Maccioni, Sara Iacuzzi.
In totu sa giorronada s'at a podi impreai su servìtziu a indonu chi s'ASPAL ponit a disponimentu po fai fotografias professionalis de ponni in su currìculu e me in is prataformas po circai traballu. Is ofertas de traballu si podint castiai in su giassu www.jobdaysardegna.it mentras is candidaduras a is collòchius si podint intregai in lìnnia o inderetura cras in Aristanis.
Acontessendi de bolli agiudu po nci mandai candidaduras o finas po informus fait a tzerriai a su nùmeru 0687155093 chi s'ASPAL at postu a disponimentu o scriri a sjd@aspalsardegna.it.
